Навоий вилоят ҳокими Қобул Турсуновга мактабларга кўрсатилаётган юксак эътибор учун «Халқ таълими ҳомийси» кўкрак нишони топширилди. Бу ҳақда Халқ таълим вазирлигининг ахборот хизмати хабар берган.
Қайд этилишича, Навоий вилоятида сўнгги йилларда мактабларни ривожлантириш учун 30 миллиард сўмдан ортиқ маблағ ажратилган.
«Вилоятда мактабларнинг моддий-техник базасини яхшилаш, уларда замонавий таълим олиш учун шароитларни яратиш, мактаблар спорт залларини зарурий спорт инвентарлари, тиббиёт хоналари, компьютер техникалари билан таъминлаш доимий тарзда амалга оширилмоқда.
Бугунги кунда вилоятдаги битирувчиларнинг ОТМга кириш кўрсаткичи энг юқори натижани қайд этган», – дейилади хабарда.
Таъкидланишича, мактабларни замонавий жиҳозлаш, жорий таъмирлаш, иссиқ сув билан таъминлаш, туман мактабларидаги мавжуд буржуйка печлари ўрнига замонавий иситиш тизими ва иситиш қозонлари ўрнатиш, қўшимча ўқув бинолари қуриб бериш, халқ таълими бўлимларини автомашиналар билан таъминлаш ҳокимликнинг доимий диққат марказидаги масалалардан бўлиб келмоқда.
Вилоятда энг яхши натижа кўрсатаётган фидойи ўқитувчиларни уй билан таъминлаш бўйича ҳам режалар белгиланган.
Эслатиб ўтамиз, бир йил аввал 2019 йил 12 ноябрда Сурхондарё вилояти ҳокими Тўра Боболов «Халқ таълими ҳомийси» кўкрак нишони билан тақдирланган, бир ой ўтгач фарғоналик тадбиркор Саидмаҳмуд Султоновга Халқ таълими вазирлигининг «Таълим ҳомийси» кўкрак нишони топширилган.
Кейинчалик, 2020 йил октябрь ойида Халқ таълими вазири Шерзод Шерматов Хоразм вилояти ҳокими Фарҳод Эрманов «Таълим ҳомийси» кўкрак нишони билан тақдирлаган.
Изоҳ (0)