Ilhom Aliyev Ozarbayjon Tog‘li Qorabog‘da armanlarga shahar boshqaruvi yoki madaniy avtonomiya berishga tayyorligini ma’lum qildi

Ozarbayjon Tog‘li Qorabog‘da armanlar uchun “o‘zini o‘zi boshqarishning ma’lum darajasini” — xususan, shahar boshqaruvi yoki madaniy avtonomiyani taqdim etishga tayyor. Bu haqda Ozarbayjon prezidenti Ilhom Aliyev BBC News’ga bergan intervyusida ma’lum qildi, deb yozmoqda “Kommersant”.

Ilhom Aliyevning fikricha, Tog‘li Qorabog‘ Ozarbayjonning ajralmas qismi bo‘lgan va shunday bo‘lib qoladi.

“Biz u yerda boshqaruvning qanday shakli bo‘lishini aniqlash uchun muzokara jarayonida katta siljishga erishmadik. Bizning pozitsiyamiz shundan iboratki, o‘zini o‘zi boshqarishning ma’lum darajasi bo‘lishi kerak, masalan, armanlar uchun shahar boshqaruvi yoki madaniy avtonomiya. Biroq biz juda uzoqqa bormadik. Tog‘li Qorabog‘ — Ozarbayjonning ajralmas qismi. U boshqa har qanday hudud kabi Ozarbayjonning bir qismi bo‘lib qoladi”, — deya ma’lum qilgan Ilhom Aliyev.

Ozarbayjon prezidentining qo‘shimcha qilishicha, u ayni paytda Tog‘li Qorabog‘ning ehtimoliy avtonomiyasi haqida gapirmaslikni ma’qul ko‘radi. “Endi vaziyat o‘zgardi. Biroq men buni ko‘p marta taklif qilganman, armanlar esa rad etgan”, — deya ta’kidlagan davlat rahbari.

Avvalroq Ilhom Aliyev Ozarbayjonga tajovuz qilinsa, Turkiyadan harbiy yordam so‘rashga tayyorligini ma’lum qilgandi.

Tog‘li Qorabog‘dagi Ozarbayjon va Armaniston o‘rtasidagi mojaro 27-sentabrdan boshlab jiddiy tus oldi. Ikki tomon bir-birini o‘t ochishda ayblamoqda. Mintaqada bir necha marta o‘t ochishni to‘xtatish rejimi haqida e’lon qilindi, biroq bu rejim har safar buzildi. CNN Turk telekanalining diplomatik manbalariga tayanib, 9-noyabr kuni xabar berishicha, Turkiya prezidenti Rajab Toyyib Erdo‘g‘on Rossiya prezidenti Vladimir Putinga mintaqadagi muammoni hal qilish uchun qo‘shma ishchi guruh tuzishni taklif qilgan.