Farg‘ona neftni qayta ishlash zavodida “Yevro-4” va “Yevro-5” standartidagi dizel yoqilg‘isini ishlab chiqarish yo‘lga qo‘yildi. Shu munosabat bilan zavodga press-tur tashkil etildi, deya xabar berdi “Daryo” muxbiri Azizjon Ermatov.
Energetika vaziri o‘rinbosari Behzot Normatov, Farg‘ona viloyati hokimi Xayrullo Bozorov, FNQIZ direktori Habib Latipov, Jizzakh Petroleum bosh direktori Shokir Fayzullayev ishtirokida dizel yoqilg‘isining gidrotozalash qurilmasi tantanali ravishda ishga tushirilgan. Fransiyaning Axens kompaniyasi tomonidan yetkazib berilgan mazkur qurilmaning loyihaviy quvvati yiliga 1 million 700 ming tonnani tashkil etadi.
Farg‘ona neftni qayta ishlash zavodi bosh muhandisi Dilshod O‘rinboyevning ma’lum qilishicha, “Yevro-4” va “Yevro-5” standartidagi dizel yoqilg‘isi ishlab chiqarish zavodni modernizatsiya qilishning birinchi bosqichi bo‘lib, loyihaning umumiy qiymati 300 million dollarni tashkil etadi.
Qayd etilishicha, Vazirlar Mahkamasining 2020-yilning 7-fevraldagi “Farg‘ona neftni qayta ishlash zavodi” MChJ quvvatidan samarali foydalanish va zavodni modernizatsiya qilishni amalga oshirish chora-tadbirlari to‘g‘risidagi qaroriga ko‘ra, 2023-yil 1-iyuldan boshlab zavod Ai-92 benzini hamda “Yevro-5” standartidagi dizel yoqilg‘isi ishlab chiqarishni yo‘lga qo‘yishi ko‘zda tutilgan. Shuningdek, zavod xalqaro standartlarga mos keladigan bazaviy va motor moylari ishlab chiqarish uchun neft bloklarini modernizatsiya qiladi.
Gidrokreking kompleksi, shuningdek, modernizatsiya qilingan yoqilg‘i va neft bloklarini o‘z ichiga olgan “Farg‘ona neftni qayta ishlash zavodi”ning kelajakdagi konfiguratsiyasi neftni qayta ishlash quvvatini 92 foizgacha oshirish imkonini beradi. Bu qo‘shimcha qiymatga ega neft mahsulotlari ishlab chiqarishni ko‘paytirishga yordam beradi. Aviatsiya va dizel yoqilg‘isi, shuningdek, bazaviy va tijorat moylari ishlab chiqarish hajmi oshadi.
Avvalroq Farg‘ona neftni qayta ishlash zavodi dizel yoqilg‘isi narxlarini pasaytirgani ma’lum qilingandi. Shuningdek, Farg‘onada 2023-yildan boshlab Ai-92 benzin va “Yevro-5” standartidagi dizel ishlab chiqarilishi haqida xabar berilgandi.
Izoh (0)