Фарғона нефтни қайта ишлаш заводида «Евро-4» ва «Евро-5» стандартидаги дизель ёқилғисини ишлаб чиқариш йўлга қўйилди. Шу муносабат билан заводга пресс-тур ташкил этилди, дея хабар берди «Дарё» мухбири Азизжон Эрматов.
Энергетика вазири ўринбосари Беҳзот Норматов, Фарғона вилояти ҳокими Хайрулло Бозоров, ФНҚИЗ директори Ҳабиб Латипов, Jizzakh Petroleum бош директори Шокир Файзуллаев иштирокида дизель ёқилғисининг гидротозалаш қурилмаси тантанали равишда ишга туширилган. Франциянинг Axens компанияси томонидан етказиб берилган мазкур қурилманинг лойиҳавий қуввати йилига 1 миллион 700 минг тоннани ташкил этади.
Фарғона нефтни қайта ишлаш заводи бош муҳандиси Дилшод Ўринбоевнинг маълум қилишича, «Евро-4» ва «Евро-5» стандартидаги дизель ёқилғиси ишлаб чиқариш заводни модернизация қилишнинг биринчи босқичи бўлиб, лойиҳанинг умумий қиймати 300 миллион долларни ташкил этади.
Қайд этилишича, Вазирлар Маҳкамасининг 2020 йилнинг 7 февралдаги «Фарғона нефтни қайта ишлаш заводи» МЧЖ қувватидан самарали фойдаланиш ва заводни модернизация қилишни амалга ошириш чора-тадбирлари тўғрисидаги қарорига кўра, 2023 йил 1 июлдан бошлаб завод Аи-92 бензини ҳамда «Евро-5» стандартидаги дизель ёқилғиси ишлаб чиқаришни йўлга қўйиши кўзда тутилган. Шунингдек, завод халқаро стандартларга мос келадиган базавий ва мотор мойлари ишлаб чиқариш учун нефть блокларини модернизация қилади.
Гидрокрекинг комплекси, шунингдек, модернизация қилинган ёқилғи ва нефть блокларини ўз ичига олган «Фарғона нефтни қайта ишлаш заводи»нинг келажакдаги конфигурацияси нефтни қайта ишлаш қувватини 92 фоизгача ошириш имконини беради. Бу қўшимча қийматга эга нефть маҳсулотлари ишлаб чиқаришни кўпайтиришга ёрдам беради. Авиация ва дизель ёқилғиси, шунингдек, базавий ва тижорат мойлари ишлаб чиқариш ҳажми ошади.
Аввалроқ Фарғона нефтни қайта ишлаш заводи дизель ёқилғиси нархларини пасайтиргани маълум қилинганди. Шунингдек, Фарғонада 2023 йилдан бошлаб Аи-92 бензин ва «Евро-5» стандартидаги дизель ишлаб чиқарилиши ҳақида хабар берилганди.
Изоҳ (0)