«Бўстонлиқдан дала ҳовли, Tashkent City’дан 2 та уй ва Captiva». «Арк булоқ» божхона пости собиқ бошлиғи олган пораларини нимага сарфлагани маълум бўлди

Ўзбекистонда ўтган икки йилда ҳуқуқни муҳофаза қилувчи органларнинг 318 нафар ходимлари жиноий қилмишлари учун жавобгарликка тортилган. Бу ҳақда бош прокурор Ниғматилла Йўлдошев раислигида ташкил этилган коррупция масалаларига оид идоралараро йиғилишда маълум қилинди, деб хабар беради «Дарё» мухбири.

Жавобгарликка тортилганларнинг 3 нафари департамент, 4 нафари Миллий гвардия, 5 нафари суд, 7 нафари адлия, 13 нафари прокуратура, 27 нафари божхона, 45 нафари Мажбурий ижро бюроси, 170 нафари ички ишлар органлари ходимлари эканлиги таъкидланди.

Маълум қилинишича, йиғилишда ҳуқуқни муҳофаза қилиш фаолиятидаги коррупция ҳолатлари муҳокама қилинган.

Таъкидланишича, «Арк булоқ» божхона пости бошлиғи Жалилов бошчилигидаги бир гуруҳ божхона ходимлари пора эвазига турли субъектлар томонидан импорт қилинган товарлар қийматини пасайтириб кўрсатиб, давлат манфаатларига қарийб 9 миллиард сўм зарар етказган.

Тергов жараёнида Жалиловнинг уйида ўтказилган тинтувда пора сифатида олинган 311 минг доллар нақд пул топилган.

Бундан ташқари, жиноий йўл билан топилган пуллар эвазига Бўстонлиқ туманида 8 сотихли дала ҳовли қурганлиги, Tashkent City мажмуасидан 2 та хонадон ва 1 та нотурар жой ҳамда Captiva автомашинасини сотиб олганлиги аниқланган. 1 та пост бошлиғи порахўрлик кетидан одамнинг ақлини шоширадиган даражада мол-мулк тўпласа, бунга ҳеч ким эътибор бермаса, қандай тушуниш мумкин? Энг эътиборли жиҳати, Жалилов ҳатто олий маълумотли бўлмасада, 4 йил давомида жуда катта товар оқимига эга бўлган йирик пост бошлиғидек масъул лавозимда ишлаб келган.

«Ҳозирда Жалилов ва унинг шериклари суд олдида жавоб бермоқда», — дейди бош прокурор.

Эслатиб ўтамиз, Давлат божхона қўмитаси раиси Муроджон Азимов 2020 йил 12 февраль куни Тошкент шаҳар божхона бошқармасида навбатдан ташқари йиғилиш ўтказганди. Ўша йиғилишда Тошкент шаҳар божхона бошқармаси бошлиғининг биринчи ўринбосари, 2 нафар ўринбосар, бошқарманинг 4 нафар бўлим бошлиғи, 2 нафар божхона пости бошлиғи, «Арк-булоқ» божхона пости бошлиғи ўринбосари эгаллаб турган лавозимидан озод қилинганди.

Шунингдек, президент Шавкат Мирзиёев 2020 йил 31 январь куни бўлиб ўтган йиғилишда божхона постларидан бирининг раҳбари ҳибсга олингани ва унинг уйидан 400 минг доллар топилгани ҳақида гапирган эди. Июль охирларида эса Тошкент шаҳар божхона бошқармаси бошлиғи Ботир Дадаматов ишдан олинганди.