Давлат статистика қўмитаси сўнгги йиллар давомида илк бор Ўзбекистонда январь—сентябрь ойларида кузатилган ўлим ҳолатлари статистикасини демографик ҳолат тўғрисидаги чораклик ҳисоботига киритмади.
Давлат статистика қўмитасининг шу каби ҳисоботларида биринчи чорак (январь—март) ва биринчи ярим йилликда (январь—июнь) кузатилган ўлим ҳолатлари тўғрисидаги маълумотлар акс эттирилган. Ўлим ҳолатлари статистикаси ундан олдинги ҳисоботларда ҳам мавжуд.
«Gazeta.uz»нинг қўмитага таяниб ёзишича, ўлим ҳолатлари статистикасини шакллантириш учун масъул бўлган Адлия вазирлиги ва Соғлиқни сақлаш вазирлиги маълумотларни Давлат статистика қўмитасига тақдим этмаган. Шу ўринда Адлия вазирлиги эса Давлат статистика қўмитасида барча маълумотлар мавжудлигини айтган. Соғлиқни сақлаш вазирлиги сўровга жавоб бермаган.
Нашрнинг Давлат статистика қўмитасидаги манбаларининг маълум қилишича, ойлик ўлим ҳолатлари статистикаси ҳар кейинги ойнинг илк 15 куни ичида тузилади. Масалан, сентябрь ойи статистикаси 15 октябргача, октябрь учун эса 15 ноябргача тайёр бўлиши керак. Август ва сентябрь ойларидаги ўлим кўрсаткичлари тўғрисидаги бир нечта сўровларга жавобан қўмита масъул вазирликларнинг ҳали ҳам маълумот юбормаганликлари ҳақида хабар қилган.
Маълумот учун, Ўзбекистонда коронавирус пандемияси сабабли ўлганлар сони июль ойида 26,4 фоизга, Тошкент шаҳрида эса 2,6 мартага ошган.
Изоҳ (0)