Jahon banki vakillari tomonidan O‘zbekistondagi qator vazirliklar va OAV xodimlari uchun tadbir o‘tkazish rejalashtirilmoqda. Undan maqsad aholining kambag‘allik yuzasidan xabardorligini oshirish va ilmiy asoslangan ma’lumotlar bilan ta’minlashdir. Bu haqda 5-noyabr kuni AOKAda o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.
Tadbirda Iqtisodiy tadqiqotlar va islohotlar markazi direktori Obid Hakimov kambag‘allik mavzusi salkam o‘ttiz yil taqiqlangan mavzu bo‘lganini gapirdi.
“Bitta narsani aytishim kerakki, kechagi muhokamalardan so‘ng bir tarafdan oxirgi to‘rt yil ichida so‘z erkinligi borasida qilingan progressni qanchalik yuqoriligini ko‘rishimiz mumkin. Ikkinchidan, bu masalaga odamlarning munosabati, ularning fikri qandayligini ham ko‘rishimiz mumkin. Mustaqil bo‘lganimizdan beri bu taqiqlangan mavzu bo‘lgan. Birinchi marta 2020-yilda Prezidentimiz tomonidan mana shu mavzu ochildi. Bu haqiqatan ham O‘zbekistondagi eng og‘riqli muammolardan biri ekani va uni hal qilishimiz muhimligi davlatimiz rahbari tomonidan 2020-yil 24-yanvar kuni Oliy Majlisga bo‘lgan murojaatnomada aytib o‘tildi hamda bu narsa haqida gap boshlandi. Bu borada oldin tadqiqotlar, izlanishlar bo‘lmagan. Shuning uchun ham ilmiy-tadqiqot institutlari, boshqa institutlar bu narsa haqida hali ham o‘z munosabatlarini bildirgani yo‘q.
Jahon banki vakillari tomonidan kelajakda sizlar boshqa vazirliklar bilan birgalikda katta tadbir o‘tkazib, aholining mana shu masala yuzasidan xabardorligini oshirish, ilmiy asoslangan ma’lumotlar bilan ta’minlash bo‘yicha o‘z hissamizni qo‘shsak, degan takliflar ham bo‘ldi. Qisqa muddatda bu tadbirni tashkil qilamiz va unga albatta, jurnalist, blogerlarni ham taklif etamiz”, — dedi Hakimov.
Izoh (0)