Жаҳон банки вакиллари томонидан Ўзбекистондаги қатор вазирликлар ва ОАВ ходимлари учун тадбир ўтказиш режалаштирилмоқда. Ундан мақсад аҳолининг камбағаллик юзасидан хабардорлигини ошириш ва илмий асосланган маълумотлар билан таъминлашдир. Бу ҳақда 5 ноябрь куни АОКАда ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Тадбирда Иқтисодий тадқиқотлар ва ислоҳотлар маркази директори Обид Ҳакимов камбағаллик мавзуси салкам ўттиз йил тақиқланган мавзу бўлганини гапирди.
«Битта нарсани айтишим керакки, кечаги муҳокамалардан сўнг бир тарафдан охирги тўрт йил ичида сўз эркинлиги борасида қилинган прогрессни қанчалик юқорилигини кўришимиз мумкин. Иккинчидан, бу масалага одамларнинг муносабати, уларнинг фикри қандайлигини ҳам кўришимиз мумкин. Мустақил бўлганимиздан бери бу тақиқланган мавзу бўлган. Биринчи марта 2020 йилда Президентимиз томонидан мана шу мавзу очилди. Бу ҳақиқатан ҳам Ўзбекистондаги энг оғриқли муаммолардан бири экани ва уни ҳал қилишимиз муҳимлиги давлатимиз раҳбари томонидан 2020 йил 24 январь куни Олий Мажлисга бўлган мурожаатномада айтиб ўтилди ҳамда бу нарса ҳақида гап бошланди. Бу борада олдин тадқиқотлар, изланишлар бўлмаган. Шунинг учун ҳам илмий-тадқиқот институтлари, бошқа институтлар бу нарса ҳақида ҳали ҳам ўз муносабатларини билдиргани йўқ.
Жаҳон банки вакиллари томонидан келажакда сизлар бошқа вазирликлар билан биргаликда катта тадбир ўтказиб, аҳолининг мана шу масала юзасидан хабардорлигини ошириш, илмий асосланган маълумотлар билан таъминлаш бўйича ўз ҳиссамизни қўшсак, деган таклифлар ҳам бўлди. Қисқа муддатда бу тадбирни ташкил қиламиз ва унга албатта, журналист, блогерларни ҳам таклиф этамиз», — деди Ҳакимов.
Изоҳ (0)