Dehqonobodda uch egizak qizaloq tug‘ildi. Tumanda egizaklarning tug‘ilishi oxirgi marotaba 33 yil ilgari qayd etilgan

Qashqadaryo viloyatining Dehqonobod tumanida uch nafar egizak qizaloq dunyoga keldi. Bu haqda xabar bergan Dehqonobod tuman hokimligi axborot xizmatiga ko‘ra, chaqaloqlar 5-noyabr kuni tug‘ilgan.

Egizaklarning onasi Lola Boymurodovaning aytishicha, oila besh nafar qiz va bir nafar o‘g‘il farzandidan so‘ng yana o‘g‘il tug‘ilishini kutgan.

“Olti nafar farzandimiz bor. Ularning besh nafari qiz va bir nafari o‘g‘il bo‘lgani uchun yana o‘g‘il farzand dunyoga keltiraman deb niyat qilgandim. Shukurki, Yaratgan egizak farzandlar bilan siyladi”, — deydi egizaklarning onasi Lola Boymurodova.

Ma’lum qilinishicha, endilikda Lola Boymurodova hamda Abduvohid Aliboyevlar xonadonida farzandlar soni to‘qqiz nafarga yetgan.

“Dehqonobod tumanida egizak farzandlarning tug‘ilishi bundan 33 yil ilgari — 1987-yil qayd etilgan ekan. Demakki, tumanimiz uchun tarixiy voqea bo‘ldi”, — deydi tuman tibbiyot birlashmasi boshlig‘i Farmon Jalilov.

Dehqonobod tuman hokimligi axborot xizmatining qo‘shimcha qilishicha, egizak qizaloqlar va ularning onasiga tuman hokimligining esdalik sovg‘alari topshirilgan.

“Tuman hokimi hamda shifokorlarga rahmat. E’tibordan chetda qoldirmay, quvonchimga quvonch qo‘shishdi. Hokim o‘rinbosari tumanimiz hokimining maxsus sovg‘a-salomini keltirib, farzandlarim tug‘ilgan kunida quvonchimga sherik bo‘ldi. Nasib etsa, shunday shukrona kunlarga atab qizlarimning birini Shukrona deb atamoqchiman”, — deydi egizaklarning onasi.

Qayd etilishicha, 1,8 kg, 1,6 kg va 1 kg vaznda tug‘ilgan chaqaloqlarga Fotima, Zuhra va Shukrona ismlarini berish niyat qilingan.

Eslatib o‘tamiz, avvalroq Andijon viloyatining Paxtaobod tumanida, shuningdek Namangan va Bekobodda to‘rt egizak dunyoga kelgan edi. Qarshi shahar tug‘ruq kompleksida esa chiroqchilik ona uch nafar egizakni dunyoga keltirgandi.