Hindistonlik Ribshox Dxedla o‘z usuli bo‘yicha ozdi — u har 10 kunda parhezini o‘zgartirgan va 11 oyda 50 kilogrammga ozishga muvaffaq bo‘lgan. U sog‘lom hayot tarzini Buyuk Britaniyada o‘qib kelganidan so‘ng tanlagan, deb yozadi “Korrespondent.net”.
23 yoshli Dxedlaning vazni 138 kilogrammni tashkil etgan, oradan qariyb bir yil o‘tgach esa 88 kilogrammga yetgan. U Buyuk Britaniyaga o‘qishga borib qaytganidan so‘ng ozishga qaror qilgan.
“U yerda odamlar fitnesni elita hayot darajasiga tenglashtiradi. O‘zimni yaxshi his qilish, hurmat qozonish va o‘zim xohlagan kiyimlarni kiyishim uchun sog‘lom hayot tarzini kechirish kerakligini tushunib yetdim”, — deydi yigit.
Dxedla 2018-yilning oxirlaridan boshlab Hindistonga qaytganidan so‘ng sog‘lom hayot tarzida yashashga o‘tgan. Bu borada unga diyetolog yordam bergan. Mutaxassis uning ovqatlanish ratsionini nazoratga olgan. U har 1,5-2 soatda ovqatlangan. Taomnomadan sabzavotlar, maydalangan bug‘doy, mevalar va yong‘oqlar o‘rin olgan. U iliq suv va ko‘k choy ko‘p ichadi.
“Tanam bu kabi diyetaga shu qadar o‘rgandiki, har safar fastfud yeyishga uringanimda menda yo‘g‘on ichak bilan bog‘liq sindrom yuzaga keldi”, — deydi u.
Shuningdek, Ribshox Dxedla fitnes bilan ham shug‘ullanishni boshlagan.
“Eng muhimi tartib-intizomga rioya qilish. Bu xuddi sehrdek ishlaydi. Fitnesning ikkinchi siri — suv. Kuniga kamida besh litr suv ichaman. U toksinlarni yuvib tashlaydi va metabolizm samaraliroq bo‘ladi”, — deya ozish sirlari bilan bo‘lishadi Ribshox.
Shuningdek, uning qo‘shimcha qilishicha, yigit tungi bazmlarni yaxshi ko‘radigan do‘stlari bilan aloqalarni uzishga majbur bo‘lgan.
Avvalroq yaponiyalik yigit bir yil ichida 65 kilo ozib, tanib bo‘lmas darajada o‘zgarib ketgani, shuningdek, amerikalik erkak tirik qolish uchun 114 kiloga ozishga majbur bo‘lgani to‘g‘risida xabar berilgandi.
Izoh (0)