Britaniyada xushbo‘y shamlar ishlab chiqarishga ixtisoslashgan Flaming Crap kompaniyasi “2020-yil ifori”ga ega shamni yaratdi. Ma’lum bo‘lishicha, ushbu noodatiy yil antiseptik, “Yo‘lbarslar qiroli”dagi Jo Ekzotik, yog‘och mushki va bananli non hidiga ega, deb yozadi Hypebeast.
Antiseptik hid haqida tushuntirib o‘tirishga hojat yo‘q. Ishlab chiqaruvchi qolgan iforlarning tanlanishiga izoh bergan.
Sham soqol olinganidan so‘ng ishlatiladigan arzon losyon hidiga ega bo‘lib, u Jo Ekzotikni yodga soladi. Kompaniyaning hisoblashicha, mashhur yo‘lbars o‘rgatuvchi karantindagi shoulari vaqtida aynan undan foydalanmoqda.
Banan va daraxt hidi esa koronavirus pandemiyasi sabab uylarga o‘tirishga majbur odamlar haqida “so‘zlaydi”. Chunki uyda o‘tirishdan zerikkan ayrim insonlar bananli nonlar yopishni boshlagan bo‘lsa, ba’zilar yog‘och hunarmandchiligi bilan shug‘ullanishga o‘tgan.
Mazkur shamning narxi 15 funt sterling bo‘lib, u 30 soatgacha yonadi.
Avvalroq olimlar minglab Apple Watch yordamida karantin “ovozi”ni o‘lchagani to‘g‘risida xabar berilgandi.
Izoh (0)