Toshkentda bir oy davomida “Toshkent yoshlarni sevadi” shiori bilan yoshlar festivali bo‘lib o‘tadi

Toshkent shahri yoshlari uchun 2020-yil noyabr oyining birinchi haftasidan boshlab bir oy “Toshkent yoshlarni sevadi” shiori ostida yoshlar festivali bo‘lib o‘tadi. Bu haqda 4-noyabr kuni Toshkent shahar hokimi Jahongir Ortiqxo‘jayev boshchiligida bo‘lib o‘tgan matbuot anjumanida ma’lum qilindi.

Ta’kidlanishicha, ushbu festival doirasida shahar yoshlari ko‘plab foydali va qiziqarli mahorat darslari, badiiy ko‘rgazmalar, ta’lim va sport tadbirlari, konsertlar, muvaffaqiyatli tadbirkorlar bilan uchrashuvlar, poytaxtning diqqatga sazovor joylariga ekskursiyalar, viktorina va tanlovlar bo‘lib o‘tishi rejalashtirilgan.

“Shu yil yoz davomida karantin sababli ko‘plab yoshlarimiz uyda o‘tirishdi, hech qanaqa ijtimoiy tadbirlar tashkil qilinmadi. Shuning hisobiga bu yoshlarimizga salbiy ta’sir qildi. Bu pandemiya balosi qachon tugashi noma’lum, lekin yoshlarga amaliy yordam ko‘rsatishimiz kerak. Albatta, bu bir oylik tadbirimiz pandemiya sharoitini hisobga olgan, boshqa kerakli tashkilotlar bilan hamkorlik qilgan holda o‘tkaziladi. Oldimizda turgan g‘ovni biz ko‘rib, bilib turibmiz. Bu tomonlarini ham hisobga olib, tadbir davomida yoshlarning kayfiyatini va motivatsiyasini oshirishga harakat qilamiz”, – dedi Jahongir Ortiqxo‘jayev.

Ma’lum qilinishicha, festival texnologiyalar, ta’lim, sport va madaniyat kabi to‘rtta yo‘nalishga bo‘lingan holda o‘tkaziladi. Tadbirning bir qismi internet-anjumanlar rejimida va ijtimoiy tarmoqlarda bo‘lib o‘tadi va bu sanitariya me’yorlarini saqlagan tarzda xohlovchilarning keng ko‘lamini qamrab olish imkoniyatini beradi.

Festival quyidagi sanalarda va manzillarda bo‘lib o‘tadi:

• 6-noyabr – Kibersport bo‘yicha musobaqa – (Cyber arena binosida);
• 7-noyabr – Robototexnika bo‘yicha Texnopark, IT Park, profilli universitetlarda ekskursiyalar;
• 8-noyabr – Harbiy o‘yinlar, o‘quv mashg‘ulotlar, konsertlar (Toshkent shahar yoshlar markazida);
• 9-noyabr – Street ball – (“Hayyat” mehmonxonasi avtoturargohida);
• 10-noyabr – Muvaffaqiyatga erishish sirlari (“Hilton” mehmonxonasi binosida);
• 11-noyabr – Modalar festivali (“Hilton” mehmonxonasi binosida);
• 12-noyabr – Shaxmat musobaqasi – (Yoshlar ijod saroyi binosida);
• 13-noyabr – Oltin raketka (Ekoparkda);
• 14-noyabr – Eko-aksiya, Futbol Drifting (“Bunyodkor” stadionida);
• 15-noyabr – Velopoyga, teatr va jazz (Yoshlar teatrida);
• 16-noyabr – Toshkent shahar hokimining yoshlar bilan uchrashuvi, Deputatlarning yoshlar bilan uchrashuvi (Shahar hokimiyati binosida);
• 17-noyabr – “Zamonaviy jurnalist” master-klasslari (“Hilton” mehmonxonasida);
• 18-noyabr – “Zamonaviy marketing” master-klasslari (“Hilton” mehmonxonasida);
• 19-noyabr – “Biznesni qanday ochish mumkin va u qanday ishlaydi?” mavzusida master-klass (“Hilton” mehmonxonasida);
• 20-noyabr – “Psixologiya” master-klassi (“Hilton” mehmonxonasida);
• 21-noyabr – Quiz fest (Tashkent City, Yapon bog‘ida);
• 22-noyabr – KVN/QVZ o‘yinlari;
• 23-noyabr – Teatrlarga ekskursiyalar;
• 24-noyabr – Freelance forum;
• 25-noyabr – Kamalak yulduzlari (O‘zbekiston davlat Konservatoriyasida);
• 26-noyabr – Yosh iste’dodlar (ko‘rgazma), vakansiyalar yarmarkasi (Yunusobod tennis sport majmuasida);
• 27-noyabr – Imkoniyati cheklangan shaxslar uchun chiqishlar (Yoshlar markazida);
• 28-noyabr – Dance Music Fest (Navro‘z bog‘ida);
• 29-noyabr – Gala konsert, harakatlanuvchi fleshmob lazer-shou (“Humo” arena sport majmuasida);

(Jadvalda tadbirlarning manzili va vaqtida o‘zgarishlar bo‘lishi mumkin)