Тошкентда бир ой давомида «Тошкент ёшларни севади» шиори билан ёшлар фестивали бўлиб ўтади

Тошкент шаҳри ёшлари учун 2020 йил ноябрь ойининг биринчи ҳафтасидан бошлаб бир ой «Тошкент ёшларни севади» шиори остида ёшлар фестивали бўлиб ўтади. Бу ҳақда 4 ноябрь куни Тошкент шаҳар ҳокими Жаҳонгир Ортиқхўжаев бошчилигида бўлиб ўтган матбуот анжуманида маълум қилинди.

Таъкидланишича, ушбу фестиваль доирасида шаҳар ёшлари кўплаб фойдали ва қизиқарли маҳорат дарслари, бадиий кўргазмалар, таълим ва спорт тадбирлари, концертлар, муваффақиятли тадбиркорлар билан учрашувлар, пойтахтнинг диққатга сазовор жойларига экскурсиялар, викторина ва танловлар бўлиб ўтиши режалаштирилган.

«Шу йил ёз давомида карантин сабабли кўплаб ёшларимиз уйда ўтиришди, ҳеч қанақа ижтимоий тадбирлар ташкил қилинмади. Шунинг ҳисобига бу ёшларимизга салбий таъсир қилди. Бу пандемия балоси қачон тугаши номаълум, лекин ёшларга амалий ёрдам кўрсатишимиз керак. Албатта, бу бир ойлик тадбиримиз пандемия шароитини ҳисобга олган, бошқа керакли ташкилотлар билан ҳамкорлик қилган ҳолда ўтказилади. Олдимизда турган ғовни биз кўриб, билиб турибмиз. Бу томонларини ҳам ҳисобга олиб, тадбир давомида ёшларнинг кайфиятини ва мотивациясини оширишга ҳаракат қиламиз», – деди Жаҳонгир Ортиқхўжаев.

Маълум қилинишича, фестиваль технологиялар, таълим, спорт ва маданият каби тўртта йўналишга бўлинган ҳолда ўтказилади. Тадбирнинг бир қисми интернет-анжуманлар режимида ва ижтимоий тармоқларда бўлиб ўтади ва бу санитария меъёрларини сақлаган тарзда хоҳловчиларнинг кенг кўламини қамраб олиш имкониятини беради.

Фестиваль қуйидаги саналарда ва манзилларда бўлиб ўтади:

• 6 ноябрь – Киберспорт бўйича мусобақа – (Cyber арена биносида);
• 7 ноябрь – Робототехника бўйича Технопарк, IT Park, профилли университетларда экскурсиялар;
• 8 ноябрь – Ҳарбий ўйинлар, ўқув машғулотлар, концертлар (Тошкент шаҳар ёшлар марказида);
• 9 ноябрь – Street ball – («Ҳайят» меҳмонхонаси автотураргоҳида);
• 10 ноябрь – Муваффақиятга эришиш сирлари («Hilton» меҳмонхонаси биносида);
• 11 ноябрь – Модалар фестивали («Hilton» меҳмонхонаси биносида);
• 12 ноябрь – Шахмат мусобақаси – (Ёшлар ижод саройи биносида);
• 13 ноябрь – Олтин ракетка (Экопаркда);
• 14 ноябрь – Эко-акция, Футбол Drifting («Бунёдкор» стадионида);
• 15 ноябрь – Велопойга, театр ва жазз (Ёшлар театрида);
• 16 ноябрь – Тошкент шаҳар ҳокимининг ёшлар билан учрашуви, Депутатларнинг ёшлар билан учрашуви (Шаҳар ҳокимияти биносида);
• 17 ноябрь – «Замонавий журналист» мастер-класслари («Hilton» меҳмонхонасида);
• 18 ноябрь – «Замонавий маркетинг» мастер-класслари («Hilton» меҳмонхонасида);
• 19 ноябрь – «Бизнесни қандай очиш мумкин ва у қандай ишлайди?» мавзусида мастер-класс («Hilton» меҳмонхонасида);
• 20 ноябрь – «Психология» мастер-класси («Hilton» меҳмонхонасида);
• 21 ноябрь – Quiz fest (Tashkent City, Япон боғида);
• 22 ноябрь – КВН/ҚВЗ ўйинлари;
• 23 ноябрь – Театрларга экскурсиялар;
• 24 ноябрь – Freelance forum;
• 25 ноябрь – Камалак юлдузлари (Ўзбекистон давлат Консерваториясида);
• 26 ноябрь – Ёш истеъдодлар (кўргазма), вакансиялар ярмаркаси (Юнусобод теннис спорт мажмуасида);
• 27 ноябрь – Имконияти чекланган шахслар учун чиқишлар (Ёшлар марказида);
• 28 ноябрь – Dance Music Fest (Наврўз боғида);
• 29 ноябрь – Гала концерт, ҳаракатланувчи флешмоб лазер-шоу («Ҳумо» арена спорт мажмуасида);

(Жадвалда тадбирларнинг манзили ва вақтида ўзгаришлар бўлиши мумкин)