Ижтимоий тармоқларда Олмалиқ кон-металлургия комбинати (ОКМК) акциядорлик жамияти биноси олдида кўплаб одамлар тўплангани акс этган видео тарқалди. Маълумотларга кўра, юзлаб кишилар комбинатга ишга қабул жараёни кетмоқда деб ўйлаб шу ерга келган. ОКМК биноси олдида нафақат олмалиқликлар, балки Оҳангарон, Пискент, Бўка ва Бекобод туманларидан ҳам келганлар борлиги айтилмоқда.
Koмбинат ахборот хизматининг ёзишича, 4 ноябрь куни «Металлург» маданият саройи ҳудудида Олмалиқ шаҳри ҳокимлиги томонидан шаҳардаги корхона ва ташкилотлар иштирокида «Бўш иш ўринлари меҳнат ярмаркаси» ташкил этилган. Ярмарка ўтказиш учун «Металлург» маданият саройи танланган. Бироқ талабгорларнинг кўплиги, хусусан, ОКМКга ишга кириш истагида яқин ҳудудлардан (Пискент, Оҳангарон, Бўка, Бекобод) ҳам келган фуқаролар ҳисобига мўлжалланган жойда тиқилинч юзага келган.
Шундан сўнг зудлик билан шаҳар ҳокимлиги, ОКМК масъуллари томонидан «Меҳнат ярмаркаси» мазкур маданият саройига ёндош ҳудудда жойлашган «Ёшлар боғи»га кўчирилган. Айни пайтда «Ёшлар боғи»да Олмалиқ шаҳар сектор раҳбарларининг сайёр қабули ҳам бўлиб ўтмоқда.
Маълумот учун, 2019 йилда комбинатга 2500 нафардан ортиқ фуқаро ишга қабул қилинган бўлиб, уларнинг 1805 нафарини ёшлар ташкил этади (шундан 321 нафари қизлар). Шу жумладан, 660 нафари аҳоли бандлигига кўмаклашиш маркази квота йўлланмасига асосан ижтимоий ҳимояга муҳтож аҳоли қатламига кирувчи шахслардир. 2020 йил бошидан бугунги кунга қадар 787 киши ишга қабул қилинган бўлиб, уларнинг 738 нафарини ёшлар ташкил этади (шундан 158 нафари қизлар).
Шунингдек, 31 октябрь куни «Металлург» маданият саройида ёшлар билан бўлиб ўтган учрашувдан сўнг 142 киши комбинатга ишга қабул қилинган. Таъкидланишича, «Ёшлик-1» конини ўзлаштириш лойиҳаси доирасида янги объектлар, хусусан, 3-МБФ қурилиши муносабати билан комбинатда 10 мингта иш ўрни босқичма-босқич очилади.
Изоҳ (0)