Toshkent viloyati hokimining birinchi o‘rinbosari lavozimiga Muzaffar Fayziyev tayinlandi. Bu haqda Toshkent viloyati hokimligi matbuot xizmati xabar berdi.
Muzaffar Fayziyev 1979-yilda Piskent tumanida tug‘ilgan. U Toshkent davlat iqtisodiyot universiteti va O‘zbekiston Respublikasi Bank-moliya akademiyasini tamomlagan. Mutaxassisligi — marketolog, moliyachi.
U mehnat faoliyatini 2000-yilda Toshkent viloyati moliya boshqarmasi hisobxona bo‘limi 1-darajali iqtisodchisi vazifasidan boshlagan. Shundan so‘ng mazkur boshqarmada bosh ekspert, bosh iqtisodchi, bo‘lim boshlig‘ining o‘rinbosari vazifalarida ishlagan. Shuningdek, Muzaffar Fayziyev O‘zbekiston Moliya vazirligi huzuridagi Respublika yo‘l jamg‘armasi ijro etuvchi direksiyasi, Toshkent viloyati bo‘yicha g‘aznachilik boshqarmasi, Toshkent viloyati moliya boshqarmasida rahbarlik lavozimlarida mehnat qilgan.
Muzaffar Fayziyev, shuningdek, O‘zbekiston Hisob palatasi, O‘zbekiston Qishloq va suv xo‘jaligi vazirligi, “O‘zneftmahsulot” aksiyadorlik kompaniyasida mas’ul vazifalarda ishlagan.
Eslatib o‘tamiz, Toshkent viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimida ishlab kelgan Bahodirbek Mullaxonov 21-oktabr kuni vafot etgandi.
Izoh (0)