Toshkent viloyati hokimining birinchi o‘rinbosari Bahodirbek Mullaxonov vafot etdi
Toshkent viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Bahodirbek Mullaxonov 21-oktabr kuni vafot etdi. Bu haqda Toshkent viloyati hokimligi matbuot xizmati xabar berdi.
Toshkent viloyati hokimligi jamoasi Bahodirbek Mullaxonovning oila a’zolari, yaqinlari va safdoshlariga ta’ziya bildirgan. Xabarda hokim o‘rinbosarining vafoti sababi ma’lum qilinmagan.
Bahodirbek Mullaxonov 2020-yilning fevral oyida Toshkent viloyati hokimining sanoatni rivojlantirish, iqtisodiyot va tadbirkorlik masalalari bo‘yicha birinchi o‘rinbosari lavozimiga tayinlangandi.
Pandemiya davrida vafot etganlar
19-oktabr kuni Kattaqo‘rg‘on tumani hokimi A’zamxon Bahromov vafot etgani haqida xabar berildi. 7-oktabr kuni Andijon viloyati Oltinko‘l tumani hokimi Nazirjon O‘rinboyev va Namangan viloyati hokimi o‘rinbosari Bahromjon Nurmatov uzoq davom etgan xastalikdan so‘ng vafot etgani ma’lum bo‘lgan edi. 29-sentabr kuni Andijon viloyatining Xonobod shahri hokimi Musaxon Mamadaliyev o‘tkir yurak qon-tomir yetishmovchiligi kasalligidan vafot etgani e’lon qilingan edi.20-sentabr kuni bosh vazir o‘rinbosari O‘ktam Barnoyev, 8-sentabrda Qashqadaryo viloyati Mirishkor tumani hokimi G‘ayrat Begaliyev, 22-avgustda Buxoro viloyati hokimi Karim Kamolov, 31-iyulda Qoraqalpog‘iston rahbari Musa Yerniyazov, 24-iyulda Qoraqalpog‘istonning Qonliko‘l tumani hokimi Daulet Tolibayev vafot etgan. Ularning barchasi koronavirus infeksiyasi asoratlari oqibatida vafot etgan.
