Тошкент вилояти ҳокимининг биринчи ўринбосари лавозимига Музаффар Файзиев тайинланди. Бу ҳақда Тошкент вилояти ҳокимлиги матбуот хизмати хабар берди.
Музаффар Файзиев 1979 йилда Пискент туманида туғилган. У Тошкент давлат иқтисодиёт университети ва Ўзбекистон Республикаси Банк-молия академиясини тамомлаган. Мутахассислиги — маркетолог, молиячи.
У меҳнат фаолиятини 2000 йилда Тошкент вилояти молия бошқармаси ҳисобхона бўлими 1-даражали иқтисодчиси вазифасидан бошлаган. Шундан сўнг мазкур бошқармада бош эксперт, бош иқтисодчи, бўлим бошлиғининг ўринбосари вазифаларида ишлаган. Шунингдек, Музаффар Файзиев Ўзбекистон Молия вазирлиги ҳузуридаги Республика йўл жамғармаси ижро этувчи дирекцияси, Тошкент вилояти бўйича ғазначилик бошқармаси, Тошкент вилояти молия бошқармасида раҳбарлик лавозимларида меҳнат қилган.
Музаффар Файзиев, шунингдек, Ўзбекистон Ҳисоб палатаси, Ўзбекистон Қишлоқ ва сув хўжалиги вазирлиги, «Ўзнефтмаҳсулот» акциядорлик компаниясида масъул вазифаларда ишлаган.
Эслатиб ўтамиз, Тошкент вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари лавозимида ишлаб келган Баҳодирбек Муллахонов 21 октябрь куни вафот этганди.
Изоҳ (0)