Sanitariya-epidemiologik osoyishtalik va jamoat salomatligi xizmatining Buxoro viloyati boshqarmasi boshlig‘i Ashur To‘xtayev 25-oktabr kuni o‘g‘lining to‘yini Buxoro shahridagi “Ipak yo‘li” to‘yxonasida o‘tkazgan, marosimda 50 dan ortiq kishi qatnashgan. Bu haqda “Daryo” muxbiri Laylo Hayitova xabar bermoqda.
Respublika maxsus komissiyasi 15-avgustdan boshlab oilaviy tantana, to‘y, ma’raka va marosimlarni fuqarolarning uy-joyi va hovlisining o‘zida, 30 kishidan ko‘p bo‘lmagan (faqat yaqin qarindoshlar va ushbu tuman hududida istiqomat qiluvchi boshqa qarindoshlar) ishtirokida o‘tkazishga ruxsat bergan edi.
28-oktabrda esa Maxsus komissiya 1-oktabrdan to‘yxonalarda to‘y o‘tkazishga ruxsat bergani ma’lum bo‘ldi. Bunda, SSV huzuridagi shtab a’zosi Botir Qurbonovning ta’kidlashicha, “100—200 kishiga emas, chegaralangan holda, 30 kishiga uy sharoitida qilingan to‘yni to‘yxonalarda o‘tkazishga ruxsat berilgan”.
Buxoro viloyati Sanitariya-epidemiologiya xizmati rahbari Ashur To‘xtayevning ta’kidlashicha, o‘g‘lining to‘yi bilan bog‘liq taraddud 2020-yil boshida boshlangan, biroq pandemiya sababli to‘y kechikib ketgan. 25-oktabr kuni o‘tkazilgan marosimda quda tomondan 15 kishidan ortiq bo‘lmagan mehmon kelishi kerak bo‘lgan, biroq to‘yga kelishilganidan ko‘proq mehmon kelgan.
“Haqiqatan ham, tashkilot rahbari bo‘la turib, xatoga yo‘l qo‘ydim, tan olaman. Aslida 30 kishilik to‘yda qaysi bir yaqiningni taklif qilishni bilmay, halak bo‘lasan, biroq bugungi kun talabi shunday. Talabga qaramay, to‘yga 50 dan ortiq mehmon keldi. O‘zbekchilik-da, istaymizmi-yo‘qmi, quda tomondan ko‘proq mehmon keldi. Ularga ‘ket’ deb, chiqarib yuborib bo‘lmaydi-ku”, — deydi To‘xtayev.
Ma’lumot o‘rnida. Buxoroda avgust oyida 150 kishilik to‘y o‘tkazgan fuqaro 4,5 million so‘m jarimaga tortilgani haqida xabar berilgan edi. Shunga o‘xshash holat oy oxirida Samarqandda ham kuzatilgan. Sentyabrda IIV Huquqbuzarliklar profilaktikasi bosh boshqarmasi to‘ylarga ruxsat berilganidan beri karantin qoidalariga zid ravishda o‘tkazilayotgan kamida 243 ta (shundan 7 tasi Buxoro viloyatida) marosim aniqlangani haqida axborot bergan edi. Birinchi karantin davrida esa taqiqqa qaramay to‘y marosimlarni o‘tkazishga uringanlarga nisbatan jinoyat ishlari ham qo‘zg‘atilgan edi.
“Har kuni kunduzi bitta to‘y o‘tkaziladi. To‘yxonada 80 dan ortiq kishini joylashtirishning imkoni yo‘q”, — dedi Erkin Jo‘rayev ushbu to‘yda 150 kishi qatnashgani haqida gap-so‘zlarga munosabat bildirarkan. U Respublika maxsus komissiyasi tomonidan to‘ylarda 30 dan ortiq odamning qatnashishi taqiqlangan bir vaqtda uning to‘yxonasida har kuni 80 kishilik marosim o‘tkazilayotgani yuzasidan biror izoh berolmasligini aytgan.
Erkin Jo‘rayevning qo‘shimcha qilishicha, uning to‘yxonasida shu kungacha o‘tkazilgan 80 kishilik to‘ylar hozircha biror muammoga sabab bo‘lmagan, shuningdek, ushbu holatlar yuzasidan unga nisbatan jarima ham qo‘llanilmagan.
Viloyat davlat sanitariya-epidemiologiya nazorati markazi rahbari Qambar Rasulov “Daryo”ga “Ipak yo‘li” to‘yxonasidagi holatlardan bexabar ekanligini bildirib, sohani isloh qilish bo‘yicha 2020-yil iyul oyida qabul qilingan hujjatlar sababli, viloyatdagi to‘yxonalarga 30 nafardan oshmagan kishi bilan to‘y o‘tkazishga ruxsat berilgani bo‘yicha tavsiya xati yetkazilmay qolganini ma’lum qildi.
Ma’lumot uchun, Prezident Shavkat Mirziyoyevning 25-iyuldagi farmonida Sanitariya-epidemiologiya xizmati tashkil etilayotganligi munosabati bilan Sog‘liqni saqlash vazirligi huzuridagi Sanitariya-epidemiologik osoyishtalik agentligi hamda Vazirlar Mahkamasi huzuridagi Sanitariya-epidemiologiya nazorati davlat inspeksiyasi va ularning hududiy bo‘linmalarini tugatish ko‘rsatib o‘tilgan.
Izoh (0)