Turkiya g‘arbidagi Izmir viloyatida yuz bergan zilzila oqibatida turar joy binolarining vayronalari ostida qolib ketgan qizaloq 91 soatdan so‘ng qutqarib olindi, deb xabar beradi Anadolu.
Izmir gubernatori Selim Koshgarning ma’lum qilishicha, Ayda Gezgin ismli 3 yoshli qizaloq qutqarib olingan.
Ayda Gezgin Izmirdagi vayronalar ostidan chiqarib olingan 107-jabrlanuvchiga aylandi.
Bolakayni qutqarishda ishtirok etgan Nusrat Aksoyning so‘zlariga ko‘ra, qizcha vayron bo‘lgan kvartiralardan biridagi kir yuvish mashinasining yoniga qisilib qolgan.
“Avvaliga uning ovozini eshitdim va boshqa qutqaruvchilarga xabar berdim. Qizaloqqacha yetib borgach uning ismini, qo‘lini qimirlata olish-olmasligini so‘radim. U qo‘lini ko‘tarib, silkitdi”, — deydi u.
Shifokorlar bolakayning ahvolini qoniqarli deb baholagan.
Avvalroq Izmirdagi zilziladan so‘ng 65 soat o‘tib, vayronalar ostida qolgan 3 yoshli qizcha qutqarib olingani to‘g‘risida xabar berilgandi.
Eslatib o‘tamiz, zilzila 30-oktabr kuni tushdan keyin Turkiyaning g‘arbiy qismida sodir bo‘lgan, uning kuchi 6,6 ballni tashkil etgandi. Zilzila epimarkazi Egey dengizida, Izmir viloyatining Seferihisar shahri yaqinida bo‘lgan.
Izoh (0)