Avstriya ichki ishlar vaziri Karl Nexammer Venada uch kishining o‘limiga olib kelgan terrorchilik hujumini IShID terrorchilik guruhi tarafdori sodir etganini ma’lum qildi, deb yozadi Meduza.
Terakt IShID tarafdori bo‘lgan kamida bir nafar terrorchi tomonidan amalga oshirilgani aytilmoqda.
Vena politsiyasi xabariga ko‘ra, hujum qilgan shaxs politsiyachilar tomonidan o‘ldirilgan. Jinoyatchi vintovka (soyli miltiq) va to‘pponchalar bilan qurollanib, beliga soxta “xudkush kamari”ni bog‘lab olgan. Politsiya terrorchining shaxsini aniqlagan, ammo bu ma’lumotni oshkor qilmagan.
Shahar politsiyasi ma’lumotlariga qaraganda, Venada oltita nuqtada bo‘lib o‘tgan otishmada uch kishi: ikki erkak va bir ayol halok bo‘lgan; yana 15 kishi, shu jumladan, bir politsiyachi yaralangan, ulardan ba’zilari og‘ir ahvolda yotibdi.
Hujum qilgan shaxs mahalliy vaqt bilan 20:09 (Toshkent vaqti bilan 3-noyabr 00:09)da, terrorchilik hujumi boshlanganidan keyin to‘qqiz daqiqa o‘tib o‘ldirilgan.
Jihodchilar Venadagi terakt Avstriyaning AQSh rahbarligidagi koalitsiyadagi ishtiroki uchun “jazoning bir qismi” bo‘lganini aytgan. Terrorchilar faoliyatini kuzatib boruvchi SITE Intelligence Group tashkiloti guruhi rahbari Rita Kats taxmin qilishicha, IShID hujumkor yoki hujumkorlarni “ilhomlantirgan” bo‘lishi mumkin, ammo hujum ishtirokchilarining harakatlarini muvofiqlashtirmagan.
Rita Kats bergan ma’lumotlarga ko‘ra, internetda go‘yoki hujum qilgan terrorchi aks etgan fotosurat tarqalgan. Unga IShID yetakchisi Abu Ibrohim al Hoshimiy al Kurashiyga qaratilgan qasamyod ilova qilingan. Fotosuratning haqiqiyligi tasdiqlanmagan.
Eslatib o‘tamiz, Avstriya poytaxti Venada noma’lum kimsalar otishma uyushtirdi. Hodisa 2-noyabr kuni kechasi Shvedenplats maydonidagi sinagoga va yahudiylar markazi joylashgan hududda ro‘y berdi.
Mavzuga doir: Avstriyada qaytadan qat’iy karantin joriy etiladi
Izoh (0)