Бразилия президенти Жаир Болсонару коронавирус пандемияси тугаётганини айтди. Унинг сўзларини 31 октябрь куни Globo нашрига таяниб, «РИА Новости» маълум қилди.
Шу билан бирга, президент Хитойнинг Sinovac компаниясининг коронавирус инфекциясига қарши вакцинаси борасида келишмовчилик юзага келган Бразилиянинг Сан-Паулу штати губернатори Жоау Сан-Дорияни қайд этиб ўтган. Sinovac Хитойдаги тадқиқот компанияси бўлиб, вакцина яратиш ва уни сотишга ихтисослашган. Компания расмий сайтида Sinovac Хитойда вакцина технологияси соҳасида 12 та патентга эгалиги айтилган.
«Пандемия ўз ниҳоясига етмоқда, менимча, у (Дориа — таҳр.) одамларни тезда эмлашни хоҳлайди, чунки пандемия тугайди ва у: ‘бу, албатта, менинг вакцинам шарофати билан’, деб айтади, тушуняпсизми?», — деган у, шунингдек, Дориа ҳукмронлиги тугаётганлигини ҳам айтиб ўтган.
Болсонарунинг ўзи ёзда коронавирус билан касалланиб чиққанди. Вирусга чалингани ҳақида 7 июль куни маълум қилган. 25 июлда эса президент касалликни енгганини маълум қилди.
Аввалроқ Жаир Болсонару мамлакат Соғлиқни сақлаш вазирлиги томонидан Хитойда ишлаб чиқарилган COVID-19’га қарши CoronaVac вакцинасини сотиб олиш бўйича тузилган битимни бекор қилганди.
Бразилия дунёда COVID-19 пандемиясидан энг кўп зарар кўрган мамлакатлардан бири бўлди. Айни пайтда Бразилия коронавирусга чалинганлар сони бўйича дунёда АҚШ ва Ҳиндистондан кейин учинчи ўринда. Мамлакатда вирус билан 5,5 миллион киши касалланган, уларнинг 4,9 миллион нафари соғайган, 159 минг киши COVID-19 қурбонига айланган.
Изоҳ (0)