Namangan viloyatining Norin tumanini viloyat markazi bilan bog‘lovchi “Norindaryo” ko‘prigi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Farg‘ona halqa yo‘lining 98-kilometrida joylashgan Norin daryosi ustidan o‘tgan avtomobil ko‘prigi orqali harakatlanish 2020-yil 24-aprel kuni to‘xtatilgandi. Bunga 1962-yilda barpo etilgan ko‘prikda kuzatilgan darz va yoriqlar sabab bo‘lgandi.
Andijon va Namangan viloyatlarini avtomobil yo‘li orqali o‘zaro bog‘laydigan Norin daryosi ustidan o‘tgan mazkur inshoot 6 oy davomida “O‘zbekiston temir yo‘llari” aksiyadorlik jamiyatiga qarashli “Ko‘prikqurilish tresti” unitar korxonasi mutaxassislari tomonidan rekonstruksiya qilindi. Buning uchun 8,3 milliard so‘m mablag‘ sarflandi.
Ko‘prik 2 tasmali avtomobil yo‘lidan iborat bo‘lib, undan 1 soatda 834 ta, sutkasiga esa 20 mingdan ortiq avtomobil o‘tkazish imkoniyati mavjud.
Rekonstruksiyadan so‘ng mazkur ko‘prikning eni qariyb 1,5 metrga kengaytirilib, ikki chetida piyodalar uchun yo‘laklar ham qurildi. Yo‘laklarning yon qismiga balandligi 1 metr 15 santimetrlik temir panjaralar o‘rnatildi. Hozirda ko‘prikning uzunligi 275, eni 10, balandligi esa 7 metrni tashkil etmoqda.
Norin hamda Uychi tumanlariga o‘tib qaytadigan piyodalarning kechki paytda ham ko‘prikda bemalol harakatlanishlarini ta’minlash uchun 13 ta elektrodiodli yoritgichlar o‘rnatildi.
Ma’lumot uchun, 160 mingdan ortiq aholiga ega Norin tumani fuqarolari 6 oy davomida viloyat markaziga qatnash uchun Uchqo‘rg‘on va Baliqchi tumanlari orqali aylanib borishiga to‘g‘ri kelgandi.
Avvalroq ijtimoiy tarmoqlarda odamlar daryoning narigi qirg‘og‘iga qayiqlarda o‘tishga majbur bo‘layotgani aks etgan videolar tarqalgandi. Shundan so‘ng Mudofaa va Favqulodda vaziyatlar vazirligi harbiy xizmatchilari daryo o‘zani uzra vaqtinchalik ko‘prik ko‘targandi.
Izoh (0)