O‘zbekiston Davlat soliq qo‘mitasi tomonidan Toshkent shahrida o‘tkazilayotgan yutuqli chek o‘yinlari 2020-yil 29-oktabrdan boshlab respublikaning barcha hududlarini qamrab oladi. Bu Prezidentning “Yashirin iqtisodiyotni qisqartirish va soliq organlari faoliyati samaradorligini oshirish bo‘yicha tashkiliy chora-tadbirlar to‘g‘risida”gi farmonida belgilab qo‘yilgan, deb xabar bermoqda Davlat soliq qo‘mitasi.
Hujjatga muvofiq, Davlat soliq qo‘mitasi tomonidan 2020-yilda Toshkent shahrida sinov tariqasida joriy etilgan yutuqli chek o‘yinlarining muvaffaqiyati sabab ushbu aksiya ko‘lami yanada kengayadi.
Endi iste’molchilar yutuqli chek o‘yinlarining navbatdagi beshinchi tirajida ishtirok etish uchun respublikaning istalgan hududida onlayn nazorat kassa mashinalari yoki virtual kassa chekini olib ro‘yxatdan o‘tkazishi mumkin.
Asosiy shart — har bir iste’molchi bitta savdo shoxobchasidan bir kunda faqat ikkita, xarid miqdori 1000 (ming) so‘mdan kam bo‘lmagan chekni ro‘yxatdan o‘tkazishi mumkin.
Yutuqli chek o‘yinlarida ishtirok etish uchun xarid qilingan mahsulot (xizmat) uchun onlayn NKM yoki virtual kassaning QR kodli chekini olish lozim.
Bunday qurilmalar barcha dorixonalar, avtomobillarga yoqilg‘i quyish shoxobchalari, alkogol va tamaki mahsulotlari savdosi bilan shug‘ullanuvchi do‘konlar, shuningdek, yirik savdo tarmoqlarida o‘rnatilgan. Hozirda respublikada qariyb 64 ming savdo shoxobchasida bunday qurilmalar mavjud.
Keyingi qadam — chekning QR kodini Soliq mobil ilovasida skanerlash yoki 12 xonali fiskal belgisini 1077 raqamiga SMS tarzda yuborish lozim. Ro‘yxatdan o‘tkazish muvaffaqiyatli yakunlangandan so‘ng, chekni ro‘yxatdan o‘tkazgan kishi yutuqli o‘yin ishtirokchisiga aylanadi.
Qo‘mita tomonidan ma’lum qilinishicha, Toshkent shahrida o‘tkazilgan yutuqli chek o‘yinlarining har bir tirajida ishtirokchilar soni tobora ortib bordi. Hozirgacha o‘tkazilgan 4 ta tirajda onlayn NKM va virtual kassalardan berilgan qariyb 110 ming dona chek ishtirok etdi. Ushbu cheklarning umumiy xarid miqdori 52 milliard so‘mdan ziyodni tashkil etadi.
Ayni vaqtga qadar beshinchi tirajda ishtirok etish uchun 30 mingdan ortiq chek ro‘yxatdan o‘tkazildi. Ushbu tirajda 2020-yil 13-oktabr soat 12:00 dan boshlab berilgan va ro‘yxatdan o‘tkazilgan cheklar ishtirok etadi. O‘yin o‘tkazilish sanasi qo‘shimcha ravishda Davlat soliq qo‘mitasi rasmiy manbalari orqali ma’lum qilinadi.
Eslatib o‘tamiz, Davlat soliq qo‘mitasi 2020-yilning 22-iyul kuni savdo cheklari asosida o‘tkaziladigan yutuqli o‘yinning birinchi tirajini o‘tkazgandi.
O‘zbekistonda tadbirkorlik subyektlari va savdo shoxobchalarida onlayn-nazorat kassalari va virtual kassalar joriy qilinmoqda. Aholining xaridlar uchun chek talab qilishi va mazkur kassalardan foydalanishni ko‘paytirish maqsadida savdo cheklari asosida o‘tkaziladigan chek lotereyasi joriy qilindi.
Izoh (0)