Беларусь президенти Александр Лукашенко мамлакатда давом этаётган намойишлар қатнашчиларини уларнинг ҳаракатларига нисбатан куч тузилмаларининг жавоби кучайтирилишидан огоҳлантирди. Бу ҳақда «Интерфакс» хабар берди.
«Бугун темир йўлга чиқаётганлар, электр узатиш тармоқларига фашистлар байроғини илаётганлар, бир сўз билан айтганда, бугун давлат инфратузилмасини бузишга, беқарорлаштиришга уринаётганлар билиши керак: бугундан бошлаб, айниқса, улар яширинаётган квартираларда биз ҳеч кимни асирга олмаймиз», — дея маълум қилган Лукашенко.
«Агар кимдир ҳарбий хизматчига тегинса (мен аллақачон бу ҳақда генералларга кўрсатма бердим), у ўша жойдан камида қўлсиз кетиши керак. Мен буни барча бизнинг бундан кейинги қатъийлигимизни билиши учун очиқ гапиряпман. Биз ҳеч қаерга чекинмаймиз ва чекинишни режалаштирмаяпмиз. Ким тайёр бўлса, ҳаракатни бошлаймиз», — дея таъкидлаган Беларусь президенти.
Лукашенконинг фикрича, рухсат этилмаган намойишларнинг ташкилотчилари ва иштирокчилари «рангли инқилоблар қўлланмасининг етти ёки саккизта босқичидан ўтган ва сўнгги — радикаллашиш дея тавсифланадиган босқичга етиб келган».
Шу муносабат билан президент «чивин бурнини суқмаслиги учун чиройли ҳаракат қилиш керак», деб ҳисоблайди. «Биз бугун вакуумда яшамаяпмиз. Бу ўтган асрнинг ўртаси эмас. Замон ўзгарди ва сиз буни яхши кўриб ва билиб турибсиз. Фақатгина темир ирода ва сабрга эга бўлган киши ғолиб чиқади», — дея таъкидлаган Лукашенко.
Беларусда уч ойдан буён 9 августда бўлиб ўтган президентлик сайлови натижаларига қарши намойишлар бўлиб ўтмоқда. Сайловда амалдаги президент Александр Лукашенко ғолиб деб эълон қилинган, у мазкур лавозимни 1994 йилдан буён эгаллаб келмоқда. Намойишлар қатнашчилари расмийлар томонидан эълон қилинган сайлов натижаларини тан олмаяпти ва уларни сохталаштирилган деб ҳисобламоқда.
Намойишлар асосан якшанба кунлари бўлиб ўтмоқда ва фақат Минскнинг ўзида кўчаларга юз минглаб одамлар чиқмоқда.
Аввалроқ Александр Лукашенко Беларусдаги намойиш қатнашчиларини терроризм йўлига ўтганликда айблаганди.
Изоҳ (0)