O‘zbekiston bo‘yicha 700 dan ortiq qishloq vrachlik punktlari qaytadan tashkil etiladi. Bu haqda Oliy Majlis Qonunchilik palatasi fraksiyalarida davlat dasturining 9 oylik ijrosi yuzasidan bo‘lib o‘tgan muhokamalar jarayonida sog‘liqni saqlash vaziri Alisher Shodmonov ma’lum qildi, deb xabar beradi “Kun.uz”.
Ma’lum qilinishicha, davlat dasturi muhokamasida deputatlar olis hududlardagi aholiga tibbiy xizmat ko‘rsatish masalasida ko‘plab e’tirozlar bo‘layotgani va bu boradagi kamchiliklarni bartaraf etish yuzasidan savol bergan.
Alisher Shodmonovning so‘zlariga ko‘ra, yuqoridagi kabi e’tirozlar tahlil etilib, hududlar kesimidagi o‘rganishlar natijasidan kelib chiqqan holda respublika bo‘yicha 700 dan ortiq qishloq vrachlik punkti qaytadan tashkil etish rejalashtirilgan.
Vazirning so‘zlariga ko‘ra, bu masalada Prezident administratsiyaga taklif kiritilgan.
Eslatib o‘tamiz, O‘zbekiston Prezidentining “O‘zbekiston Respublikasida birlamchi tibbiy-sanitariya yordami muassasalari faoliyatini tashkil etishni yanada takomillashtirish chora-tadbirlari to‘g‘risida”gi qaroriga ko‘ra, qishloq-vrachlik punktlari sonini 2985 tadan 1612 tagacha qisqartirish va 793 ta QVP negizida kunduzgi statsionari mavjud bo‘lgan qishloq oilaviy poliklinikalarini tashkil etish belgilangan.
Izoh (0)