AQShning Trigon International INC kompaniyasi ilg‘or texnologiyalardan foydalangan holda Buxoro viloyatining Peshku tumanida kannabis navlarini yetishtirish va ko‘paytirish, ushbu o‘simlikdan talab yuqori bo‘lgan zamonaviy tibbiy dori-darmon vositalari ishlab chiqaruvchi klasterni barpo etish va sarmoya kiritish maqsadini bildirdi. Bu haqda “Dunyo” axborot agentligi xabar bergan.
Qayd etilishicha, xorijiy kompaniya mahalliy iqlim sharoitini o‘rgangan holda qiymati 250 million AQSh dollariga teng investitsiya kiritadi. Muzokaralar mobaynida investorning to‘g‘ridan to‘g‘ri xorijiy investitsiyasi hisobidan yaratilishi kafolatlangan.
“Yetishtiriladigan tibbiy kannabis mahsulotini Yevropa davlatlari hamda boshqa xorij mamlakatlarga eksport qilish rejalashtirilgan. Loyiha amalga oshishi natijasida 500 dan ortiq yangi ish o‘rni yaratiladi, yiliga 16 ming litr yog‘-moy ishlab chiqariladi.
Peshku tumani hokimiligi vakillari va Trigon International INC kompaniyasi rahbariyati o‘rtasida onlayn shaklda bilan o‘tkazilgan muloqotda loyihani amalga oshirish bilan bog‘liq tayyorgarlik ishlari yuzasidan fikr almashildi”, – deyiladi agentlik axborotida.
Eslatib o‘tamiz, 2020-yil 17-mart kuni imzolangan Prezident qarorida O‘zbekistonda sanoat maqsadlarida kannabis o‘simligini yetishtirishga ruxsat berilgan, keyinchalik Adliya vazirligi kannabis yetishtirishga nima uchun ruxsat berilganiga aniqlik kiritgandi.
Izoh (0)