Qashqadaryo hokimiga yana 2 nafar maslahatchi tayinlandi. Zoir Mirzayevning maslahatchilari 6 nafarga yetdi

Qashqadaryo viloyati hokimi Zoir Mirzayevga yana ikki nafar maslahatchi tayinlandi. Bu haqda viloyat hokimligi axborot xizmati xabar berdi.

Ta’kidlanishicha, viloyat xalq ta’limi boshqarmasi boshlig‘i Farhod Ochilov viloyat hokimining ta’lim masalalari bo‘yicha maslahatchisi etib tayinlangan. Boshqarma boshlig‘iga, shuningdek, o‘rinbosar maqomi berilib, ishlashi uchun viloyat hokimligidan alohida xona ajratilgan.

Ayni kunga qadar G‘uzor tuman hokimligida investitsiyalar va tashqi savdo bo‘limi boshlig‘i lavozimida ishlab kelgan Azamat Avazov esa hokimning turizm va sportni rivojlantirish masalalari bo‘yicha maslahatchisi lavozimini egallagan.

Ma’lum bo‘lishicha, ayni paytda Zoir Mirzayevning maslahatchilari soni olti nafarga yetgan.

Bundan tashqari, viloyat hokimligida boshqa tayinlovlar ham amalga oshirilgan.

Viloyat hokimligida huquqni muhofaza qilish organlari faoliyati, harbiy safarbarlik va favqulodda vaziyatlar masalalari guruhi yetakchi mutaxassisi lavozimida ishlab kelgan Lobar Rahimova hokimlikning ishlar boshqarmasi devonxona mudiri lavozimini egallagan bo‘lsa, viloyat hokimligida tashkiliy-nazorat guruhi yetakchi mutaxassisi lavozimida ishlab kelgan Suhrob Ashurov hokimning moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari kotibiyatining tadbirkorlik va ishbilarmonlik muhitini rivojlantirish, eksportga ko‘maklashish va qo‘llab-quvvatlash guruhi rahbari etib tayinlangan.

Shuningdek, Fazliddin O‘taganov hokimlik axborot-tahlil guruhi bosh mutaxassisi, Fazliddin Xudalov tashkiliy-nazorat guruhi yetakchi mutaxassisi, Sherzod Hasanov hokimlik Axborot xizmati 1-toifali mutaxassisi, Jamshid Ahatov hokimning sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari kotibiyati 1-toifali mutaxassisi, Shohruh Erboyev viloyat hokimligi ishlar boshqarmasi 1-toifali mutaxassisi lavozimlariga o‘tkazilgan.