Евроиттифоқ аҳолисининг бир қисмигина 2022 йилгача коронавирусга қарши вакцина олиши мумкин, чунки Евроиттифоқ буюртма қилиб қўйган COVID-19’га қарши потенциал дорилар самарасиз бўлиб чиқиши ёки кам миқдорда ишлаб чиқарилиши мумкин, деб ёзади «РБК».
«2021 йил охиригача бутун аҳоли учун етадиган COVID-19’га қарши вакцина дозаси бўлмайди», — деган Еврокомиссия вакили Евроиттифоқ дипломатлари билан ўтказилган ёпиқ мажлисда.
Евроиттифоқ коронавирусга қарши жами 1 миллиарддан ортиқ дозада потенциал вакцина буюртма қилиб қўйган. Уларни AstraZeneca, Sanofi ва Johnson & Johnson каби компаниялар ишлаб чиқмоқда.
Johnson & Johnson’нинг бўлинмаси Janssen Pharmaceutica NV билан шартнома октябрь бошида тузилган эди. Шартномага кўра, агар дори хавфсиз ва самарали бўлиб чиқса, Евроиттифоқ мамлакатлари уни 200 миллион киши учун сотиб олади.
Аввалроқ Буюк Британиянинг AstraZeneca компанияси томонидан яратилган коронавирусга қарши вакцина синовида иштирок этаётган кўнгилли вафот этгани маълум қилинган эди.
Microsoft асосчиси Билл Гейтс барча синов босқичидан ўтган коронавирусга қарши вакцина АҚШда келаси йил бошларида пайдо бўлишини айтди. Шу билан бирга, Гейтс дастлабки вакциналар идеал бўлмаслиги ҳам мумкинлигини тан олган.
Россияда эса коронавирусга қарши иккинчи вакцинани ишлаб чиқариш бошланди.
Мавзуга доир:
- Johnson & Johnson фармацевтик компанияси иштирокчилардан бири касал бўлиб қолгани туфайли COVID-19’га қарши вакцина синовларини тўхтатди
- АҚШда Эли Лиллй компаниясининг COVID-19’га қарши дориси синовлари тўхтатилди
- Хитойнинг коронавирусга қарши вакцинаси синовларида қатнашадиган ўзбекистонлик кўнгиллиларга пул тўланиши мумкин
Изоҳ (0)