Ilon Maskning kompaniyasi Xitoyda sotilgan 50 mingga yaqin Tesla elektromobillarini qaytarib oladi. Bu kabi majburiy qaror Xitoy bozorini tartibga solish davlat boshqarmasining ko‘rsatmasiga binoan qabul qilingan. Xitoy davlat tashkiloti Model S va Model X modellarining “podveska”sida muammolarni aniqlagan, deb yozadi “Korrespondent.net”.
Idora ma’lumotlariga ko‘ra, Xitoydagi servis markazlariga 2013-yilning 17-sentabridan 2017-yilning 16-avgustiga qadar mamlakatga olib kirilgan 29 193 ta Model S va Model X, shuningdek, 2013-yilning 17-sentabridan 2018-yilning 15-oktabriga qadar import qilingan 19 249 ta Model S yuboriladi.
Gap Tesla’ning Frimontdagi zavodida yig‘ilgan avtomobillari haqida ketmoqda. Mashinalarning qaytarib olinayotganiga old va orqa “podveska” richagida kuzatilgan muammolar sabab bo‘lgan. Ta’kidlanishicha, zarba oqibatida yoriq paydo bo‘lib, natijada richag butunlay yakson bo‘lishi mumkin.
Ilon Mask kompaniyasi bu borada bahslashib o‘tirmagan va muammo aniqlangan barcha avtomobillarning nuqsonli richagini bepul almashtirib berishga rozi bo‘lgan. Ammo ular nuqsonli richaglarda tartibsiz xitoylik haydovchilarni ayblagan. Xitoydan Tesla avtomobillarining chaqirib olinishi to‘g‘risidagi xabarlar kompaniya aksiyalarining 2 foizga arzonlashishiga olib kelgan.
Avvalroq NASDAQ birja savdolarining yakuni bo‘yicha Tesla aksiyalari 3,3 foizga ko‘tarilgan edi.
Eslatib o‘tamiz, 2015-yilda Volkswagen ham o‘z avtomobillaridagi nosozlik sabab Xitoydan qariyb olti ming dona avtomobilini chaqirib olgandi.
Izoh (0)