Илон Маскнинг компанияси Хитойда сотилган 50 мингга яқин Tesla электромобилларини қайтариб олади. Бу каби мажбурий қарор Хитой бозорини тартибга солиш давлат бошқармасининг кўрсатмасига биноан қабул қилинган. Хитой давлат ташкилоти Model S ва Model Х моделларининг «подвеска»сида муаммоларни аниқлаган, деб ёзади «Korrespondent.net».
Идора маълумотларига кўра, Хитойдаги сервис марказларига 2013 йилнинг 17 сентябридан 2017 йилнинг 16 августига қадар мамлакатга олиб кирилган 29 193 та Model S ва Model Х, шунингдек, 2013 йилнинг 17 сентябридан 2018 йилнинг 15 октябрига қадар импорт қилинган 19 249 та Model S юборилади.
Гап Tesla’нинг Фримонтдаги заводида йиғилган автомобиллари ҳақида кетмоқда. Машиналарнинг қайтариб олинаётганига олд ва орқа «подвеска» ричагида кузатилган муаммолар сабаб бўлган. Таъкидланишича, зарба оқибатида ёриқ пайдо бўлиб, натижада ричаг бутунлай яксон бўлиши мумкин.
Илон Маск компанияси бу борада баҳслашиб ўтирмаган ва муаммо аниқланган барча автомобилларнинг нуқсонли ричагини бепул алмаштириб беришга рози бўлган. Аммо улар нуқсонли ричагларда тартибсиз хитойлик ҳайдовчиларни айблаган. Хитойдан Tesla автомобилларининг чақириб олиниши тўғрисидаги хабарлар компания акцияларининг 2 фоизга арзонлашишига олиб келган.
Аввалроқ NASDAQ биржа савдоларининг якуни бўйича Tesla акциялари 3,3 фоизга кўтарилган эди.
Эслатиб ўтамиз, 2015 йилда Volkswagen ҳам ўз автомобилларидаги носозлик сабаб Хитойдан қарийб олти минг дона автомобилини чақириб олганди.
Изоҳ (0)