Samsung konserni raisi vafotidan keyin 15,6 milliard dollarlik aktivlarni meros qilib qoldirdi. Yonhap nashrining yozishicha, merosxo‘rlar ushbu mablag‘larning yarmini soliq tarzida to‘lashiga to‘g‘ri keladi.
2020-yil 25-oktabrda Janubiy Koreyada vafot etgan Samsung konserni raisi Li Gon Xining merosxo‘rlari meros uchun rekord darajada katta soliq to‘laydi.
Li Gon Xi merosni bevasi va uch farzandiga qoldirgan. O‘g‘li Li Chje Yon oxirgi besh yildan buyon Samsung’ni boshqarmoqda, shuningdek, milliarderning ikki qizi Li Bujin va Li So Xyon ham bor.
Konsernning marhum rahbari Samsung Electronics Co. flagman kompaniyasining 4,18 foiz aksiyalari, shuningdek, 0,08 foiz imtiyozli aksiyalariga egalik qilardi. U Samsung Life Insurance Co.ning 29,76 foiz aksiyalari, Samsung C&T Corp.ning 2,88 foiz va Samsung SDS Co’ning 0,01 foiz aksiyalari egasi edi.
Li vafotidan keyin 18 trillion vonlik aktivlar (taxminan, 15,6 milliard AQSh dollari) meros bo‘lib qolmoqda. Yonhap’ning soliq tizimidagi ekspertlarga tayangan holda axborot berishicha merosxo‘rlar aksiyalar uchun taxminan 10 trillion von (8,87 milliard dollar) to‘lashi talab etiladi.
Samsung rahbarining oilasi ushbu soliqlarni bir necha yil davomida to‘lash huquqiga ega: Janubiy Koreya qonunchiligiga ko‘ra to‘lovlar besh yil va undan ortiq muddatda bo‘lib to‘lanishi mumkin. Avval 2018-yilda vafot etgan LG Group rahbari Ku Bon Muning merosxo‘rlari soliqlarni shunday tarzda to‘lagandi.
Li Gon Xi 78 yoshda vafot edi. U 2014-yilda yurak xurujiga uchragan, shundan keyin milliarderning sog‘lig‘ida muammolar kuzatila boshlagan edi. Li sog‘lig‘i bilan bog‘liq muammolar sabab konsern boshqaruvini o‘g‘liga topshirgan.
Li Gon Xi — Samsung asoschisi Li Ben Chxolning o‘g‘li. U 1987-yilda otasining vafotidan keyin kompaniya boshqaruvini qabul qilib olgan, 1993-yildan boshlab g‘arbcha siyosat asosida korporativ islohotlarni amalga oshirgandi. Li boshqaruvi ostida Samsung 25 yil ichida Koreya ishlab chiqaruvchisi darajasidan jahon bozorida elektrotexnika mahsulotlari bo‘yicha yetakchi kompaniyalar qatoriga kirgan.
Izoh (0)