Samsung Electronics boshqaruv raisi Li Gon Xi Seuldagi kasalxonada vafot etdi, deb xabar bermoqda “Kommersant”. So‘nggi bir necha yil davomida salomatligi bilan bog‘liq muammolar tufayli Li Gon Xi kompaniyaning rasmiy rahbari bo‘lib qolgan, aslida esa konsernni uning o‘g‘li Li Chje Yon boshqarib kelardi.
“Ryonxap” agentligi aniqlik kiritishicha, so‘nggi bir necha yil mobaynida Li Gon Xi kasalxonada yotgan. Salomatligi yomonlashishiga 2014-yilda boshidan kechirgan yurak xuruji sabab bo‘lgan.
“Rais Li Samsung’ni mahalliy biznesdan yetakchi dunyo novatoriga va sanoat gigantiga aylantira olgan oldindan ko‘ra biluvchi inson edi. Uning 1993-yildagi “yangi menejment” haqidagi bayonoti kompaniyaning global jamiyat rivoji uchun eng yaxshi texnologiyalarni taqdim etish bo‘yicha faoliyatida harakatga keltiruvchi kuch rolini o‘ynadi”, — deyiladi konsern bayonotida.
Li Gon Xi 1942-yil 9-yanvarda tug‘ilgan. Uning otasi — Li Byon Chxol Samsung Electronics asoschisi bo‘lgan. Li Gon Xining o‘zi 1968-yilda konsernga kelib qo‘shilgan, 1987-yilda uning rahbariga aylangan. 2008-yilda sud uni soliqlarni to‘lashdan bosh tortganlikda ayblab, shartli hibsga mahkum etgani sababli iste’foga chiqishga majbur bo‘lgan. Keyinroq Janubiy Koreya Oliy sudi hukmni bekor qilgan. 2010-yilda Li Gon Xi konsern boshqaruviga qaytgan. Forbes hisob-kitoblariga ko‘ra, 12,6 milliard dollarlik sof foyda bilan Li Gon Xi va uning oilasi dunyoning eng boy odamlari safiga kiradi.
Izoh (0)