Amerikaning Atari kompaniyasi 1970-yillarda butun o‘yin sanoatiga turtki bo‘lgan Pong o‘yinini qayta taqdim etdi. Mini Pong nomini olgan o‘yin afsonaviy o‘yinning ixcham varianti hisoblanadi, deb yozadi Portaltele.
Avvallari o‘yin versiyasi sekin-asta arkad avtomatlardan uy konsollariga o‘tgan bo‘lsa, endilikda bu boshqaruv uchun ikkita regulyatorga ega 8 dyuymli planshetga aylandi. Unda boshqa hech qanday qo‘shimcha o‘yin yoki funksiyalar yo‘q, faqatgina ovoz balandligini boshqarish mumkin.
Mini Pong uchta AA-batareyalari yordamida ishlaydi. O‘yinni ikki kishi yoki botga qarshi o‘ynash mumkin — uning 10 ta murakkablik darajasi bor.
Kompaniya konsolning ishga tushirilishiga oid batafsil ma’lumotlarni oshkor qilmagan — savdolar boshlanishi va uning narxi to‘g‘risida keyinroq ma’lumot berilishi aytilmoqda.
Pong — eng birinchi arkad videoo‘yinlaridan biri hisoblanadi. Bu ikki o‘lchamli oddiy grafikadan foydalangan holda o‘ynaladigan tennis sport o‘yini bo‘lib, u 1972-yilda Atari firmasi tomonidan taqdim etilgan. Pong tijoriy videoo‘yinlar orasidagi muvaffaqiyatga erishgan birinchi o‘yin hisoblanadi.
Izoh (0)