Senat ichki ishlar organlari jamoatchilik va OAV bilan o‘zaro hamkorlik memorandumini tasdiqlashi zarurligini belgiladi

21-oktabr kuni Senatning sakkizinchi yalpi majlisida Ichki ishlar vazirligi va Bosh prokuraturaga parlament so‘rovi yuborish to‘g‘risidagi qarori natijalari ko‘rib chiqildi.

Jumladan, Ichki ishlar vazirligi tomonidan qaror ijrosini ta’minlash doirasida Birlashgan Millatlar Tashkilotining 1984-yildagi konvensiyasi va Jinoyat-protsessual kodeksga qat’iy amal qilish bo‘yicha yangi tartib yo‘lga qo‘yilgani bildirildi. Ichki ishlar organlarining 468 ta ma’muriy binosi, 91 ta vaqtincha saqlash hibsxonasi, 13 ta maxsus qabulxona, 12 ta reabilitatsiya markazi, 43 ta jazoni ijro etish muassasasi, 11 ta tergov hibsxonasida jami 9 547 ta kuzatuv kamerasi o‘rnatilgani ma’lum qilindi.

Majlisda senatorlar IIV va Bosh prokuratura ayrim muammoli masalalarni bartaraf etish choralarini ko‘rishi kerakligini ta’kidladi.

Xususan, IIV bir oy muddatda BMT konvensiyasi va Respublika Jinoyat-protsessual kodeksiga qat’iy amal qilish bo‘yicha chora-tadbirlarni ishlab chiqish, ichki ishlar organlari faoliyatining ochiqligini ta’minlash uchun jamoatchilik va OAV bilan o‘zaro hamkorlik memorandumini tasdiqlash zarurligi belgilandi.

Shuningdek, Bosh prokuratura va Oliy Majlisning Inson huquqlari bo‘yicha vakili (Ombudsman) bilan hamkorlikda tergov hibsxonalari, ozodlikdan mahrum etish joylari va shaxslar turgan, o‘z ixtiyori bilan chiqib keta olmaydigan boshqa joylarda xizmat olib boruvchi xodimlarining qiynoqqa solish, shafqatsiz va g‘ayriinsoniy yoki qadr-qimmatni kamsituvchi xatti-harakatlarining barvaqt oldini olish 2021-yilga mo‘ljallangan qisqa muddatli o‘quv dasturi ishlab chiqish ta’kidlandi.

2021-yil yakuniga qadar barcha hududiy tergov bo‘linmalarida so‘roq jarayonini stenografiya qilish, videokuzatuv, tergov harakatlarini audio va video qayd etish tizimlari bilan jihozlangan maxsus tergov xonalari tashkil etish zarurligi tasdiqlandi.

Masala yuzasidan Oliy Majlis Senatining tegishli qarori qabul qilindi.

Eslatib o‘tamiz, avvalroq O‘zbekistonda Qiynoqning oldini olish qo‘mitasi tashkil etilishi ko‘zda tutilayotgani, qo‘mita huquqni muhofaza qiluvchi alohida organ, ya’ni insonning qiynoqdan himoya qilishga doir konstitutsiyaviy huquqini ta’minlash bo‘yicha respublika davlat boshqaruvi organi sifatida o‘z vakolatlarini mustaqil hamda davlat organlari, ularning mansabdor shaxslariga tobe bo‘lmagan tarzda amalga oshirishi, o‘z faoliyatida Respublika Prezidenti va Oliy Majlisi palatalariga hisobdor bo‘lishi belgilanishi aytilgan.