Vazirlar Mahkamasining 2020-yil 20-oktabrdagi qarori Yong‘in xavfsizligi qoidalari tasdiqlandi. Bu haqda Adliya vazirligi xabar berdi.
Qaror bilan tasdiqlangan yong‘in xavfsizligi qoidalari 7 bo‘lim, 41 bob va 846 banddan iborat.
Mazkur qoidalar davlat va xo‘jalik boshqaruvi organlari, mahalliy davlat hokimiyati organlari, fuqarolar o‘zini o‘zi boshqarish organlari, korxonalar, muassasalar, tashkilotlar, ularning xodimlari, shuningdek, yakka tartibdagi tadbirkorlar va fuqarolar uchun majburiy hisoblanadi.
Qoidalarga ko‘ra, o‘ta muhim davlat ahamiyatiga molik, yirik ijtimoiy-madaniy obyektlarda yong‘in-texnik komissiyasi tuzilishi hamda obyektning yong‘in xavfsizligi pasporti ishlab chiqilishi kerak.
Bino va inshootlarning yong‘inga qarshi oraliqlarida turli buyumlar, asbob-uskunalar, qadoqlarni va transport vositalarini saqlash hamda bino inshootlarni qurish (o‘rnatish) taqiqlanadi.
1000 nafar va undan ortiq odam sig‘imiga ega bo‘lgan muassasalarda eng yaqin yong‘in-qutqaruv bo‘linmasi bilan to‘g‘ridan to‘g‘ri telefon aloqasi o‘rnatilishi kerak.
Ushbu qoidalar quyidagilarda yong‘in xavfsizligini ta’minlash bo‘yicha talablarni belgilamaydi:
- o‘rmon xo‘jaligi hududlarida;
- kon qazilma va shaxta inshootlarida;
- portlovchi materiallar ishlab chiqarilayotganda, tashilayotganda, saqlanayotganda, ulardan foydalanilayotganda va ular utilizatsiya qilinayotganda;
- sanoat uchun mo‘ljallangan portlovchi materiallardan foydalanilgan holda portlatish ishlarini olib boruvchi tashkilotlarda;
- havo, suv, temir yo‘l, avtomobil transporti hamda elektr transportida.
Eslatib o‘tamiz, O‘zbekiston Prezidenti Shavkat Mirziyoyev raisligida 2020-yil 8-iyul kuni o‘tkazilgan videoselektor yig‘ilishida tadbirkorlar duch kelayotgan bir-biriga zid sanitariya va yong‘in xavfsizligi qoidalarini bartaraf etish bo‘yicha topshiriq berilgandi.
Izoh (0)