San-Fransiskodagi hayvonot bog‘idan artritdan azob chekib kelgan Maki laqabli 21 yoshli lemur o‘g‘irlab ketildi. Uni topishga besh yoshli bolakay yordam berdi, deb yozadi Associated Press.
Lemur yo‘qolgani to‘g‘risidagi xabarlar 14-oktabr kuni mahalliy OAVda yoritilgan bo‘lib, hayvonot bog‘i vakillari muassasa hududiga noqonuniy ravishda kimdir kirganini ma’lum qilgan. Makini qaytargan kishiga 2100 dollar miqdorida mukofot va’da qilingan (umrining har yili uchun 100 dollardan). Chunki mushuksimon lemurlar qirilib ketish xavfi ostida turgan tur hisoblanadi.
Yo‘qolgan hayvonni ertasi kuni besh yoshli Jeyms Trin payqab qolgan. Bolakay hayvonot bog‘idan 8 kilometr narida joylashgan Lyuteranlar cheklovi bog‘chasidan chiqayotib, unga ko‘zi tushgan. “Bu lemur! Bu lemur!” — deya baqirgan bolakay. Jeymsning yonida bo‘lgan bog‘cha direktori Sintiya Xuang avvaliga unga ishonmagan: “Bu yenot emasligiga ishonching komilmi?”.
Bu orada Maki avtoturargohdan bolalar maydonchasiga yugurib borgan va o‘yinchoq uylardan biriga yashirinib olgan. U yerdan lemurni hayvonot bog‘i xodimlari ushlab, olib ketgan.
https://twitter.com/JustineWaldman/status/1317660298774409222
15-oktabr kuni Makini o‘g‘irlaganlikda gumonlangan 30 yoshli Kori MakGillouey hibsga olingan. Shu bilan birga, ko‘ngilsiz hodisa sodir bo‘lgan kunda u lemurga bog‘liq bo‘lmagan ayblov bilan ushlangan edi. Endilikda u vandalizm va lemurni o‘g‘irlashda ayblanmoqda.
Hayvonot bog‘idagilarning ma’lum qilishicha, keksa Maki och bo‘lgan. Kasallik sabab u alohida e’tibor talab qilgan, biroq bir kun qarovsiz qolgan hayvonning sog‘lig‘i yomonlashgan. Endilikda Maki izolyatsiyaga yuborilgan bo‘lib, tez orada u boshqa lemurlar oldiga qaytadi.
https://twitter.com/sfchronicle/status/1317484839071670275
Pul mukofoti cherkovga beriladi, besh yoshli Jeyms esa oilasi bilan hayvonot bog‘iga cheksiz bepul tashrif buyurish imkoniyatiga ega bo‘ldi.
Izoh (0)