Швейцария ҳукумати 19 октябрь кунидан барча жамоат жойларида мажбурий ниқоб тақишни жорий қилди, деб хабар бермоқда «РБК». Бу COVID-19 коронавирус инфекциясига чалинганлар сонининг ўсиши туфайли кўрилган чорадир.
Бунда гап, хусусан, дўконлар, савдо марказлари, банклар, почта бўлинмалари, кутубхоналар, кинотеатрлар, театрлар ва концерт заллари, меҳмонхоналар (хоналардан ташқари), ресторанлар, барлар, касалхоналар, диний муассасалар ҳақида бормоқда. Шунингдек, ниқоб режимига жамоат транспортида, вокзалларда, аэропортларда, автобус ва трамвай бекатларида риоя қилиш керак. Бундай талаб 12 ёшдан кичик болалар учун амал қилмайди.
Шу кундан эътиборан, Швейцария Федерал кенгаши жамоат жойларида 15 нафардан ортиқ одамнинг гуруҳ бўлиб тўпланишини тақиқлади. Бундан ташқари, ресторан, бар ва тунги клубларда егулик ва ичимликларни фақат ўтирадиган жойларда истеъмол қилишга рухсат берилди. Иш берувчиларга ходимларини масофадан ишлаш режимига ўтказиш тавсия этилди.
Швейцария президенти Симонетта Соммаруга мамлакатда COVID-19 тарқалиши билан боғлиқ вазиятни жиддий деб атади ва ҳукумат кейинроқ янги чораларни жорий қилиши мумкинлигини ҳам айтди.
Жонс Ҳопкинс университети маълумотларига кўра, пандемия бошидан буён Швейцарияда коронавирусга чалиниш билан боғлиқ 74,4 мингта ҳолат қайд этилган, 2,1 минг киши вафот этган.
16 октябрь куни мамлакатда 3105 кишида касаллик аниқланди, бу бир кеча-кундуз учун рекорд рақам ҳисобланади.
Аввалроқ Австрия ва Бельгия ташқи ишлар вазирларида COVID-19 аниқлангани хабар берилган эди. Австрия ташқи ишлар вазири Александр Шалленберг вирусни 12 октябрь куни Люксембургда бўлиб ўтган Европа иттифоқи Ташқи ишлар кенгаши мажлисида Бельгия ТИВ раҳбари Софи Вильмес билан мулоқот қилиши оқибатида юқтириб олган бўлиши мумкин.
Эслатиб ўтамиз, Францияда ўтган бир кеча-кундузда 32,4 мингдан ортиқ киши коронавирусга чалинди, бу рекорд кўрсаткич ҳисобланади. Аввалроқ Германия президенти Франк-Вальтер Штайнмайер 17 октябрь куни тан соқчисида коронавирус аниқланганидан кейин карантинга олинган эди.
Изоҳ (0)