O‘zbekiston Prezidenti Shavkat Mirziyoyev raisligida 19-oktabr kuni 2021-yilga mo‘ljallangan davlat budjeti parametrlari muhokamasiga bag‘ishlangan videoselektor yig‘ilishi o‘tkazildi. Bu haqda Prezident matbuot xizmati xabar berdi.
Ma’lum qilinishicha, pandemiya sharoitida ijtimoiy sohaga ajratiladigan xarajatlar 2020-yilga nisbatan kamida 15 foizga oshirilishi rejalashtirilmoqda. Jumladan, 2021-yilda maktabgacha ta’lim qamrovi darajasini 70 foizga, bunda xususiy sektor ulushini 25 foizga yetkazish maqsad qilingan. Xalq ta’lim vazirligiga budjetdan ajratmalar 16 foizga oshiriladi. Maktablarni tezkor internetga ulash bo‘yicha birinchi marta budjetdan 100 milliard so‘m, jihozlashga 200 milliard so‘m yo‘naltirish nazarda tutilmoqda.
Bundan tashqari, ilm-fanni rivojlantirish konsepsiyasi doirasida 2021-yil innovatsion rivojlantirish va novatorlik g‘oyalarini qo‘llab-quvvatlash jamg‘armasiga budjetdan 2 baravar ko‘p mablag‘ yoki 100 milliard so‘m ajratiladi.
Yana bir muhim jihat — 2021-yilda chin yetim bolalarni uy-joy bilan ta’minlash uchun budjetdan birinchi marotaba 30 milliard so‘m ajratilishi belgilangan. Mutasaddilarga bu borada yangi tartib va ro‘yxatlar ishlab chiqish topshirildi.
Eslatib o‘tamiz, Shavkat Mirziyoyev raisligida 11-may kuni raqamli iqtisodiyot va elektron hukumatni keng joriy etish masalalari bo‘yicha o‘tkazilgan yig‘ilishda O‘zbekistonda 2020-yilda barcha shifoxonalar va bolalar bog‘chalarini optik tolali internetga ulash rejalashtirilayotgani ma’lum qilingandi.
Axborot texnologiyalari va kommunikatsiyalarini rivojlantirish vaziri Shuhrat Sodiqov 2020-yilning iyul oyida respublika bo‘yicha 4786 ta maktab, 2895 ta maktabgacha ta’lim tashkiloti, 1729 ta sog‘liqni saqlash muassasasi tezkor internetga ulangani haqida ma’lumot bergandi.
Izoh (0)