O‘zbekiston Prezidenti Shavkat Mirziyoyev raisligida 19-oktabr kuni 2021-yilga mo‘ljallangan davlat budjeti parametrlari muhokamasiga bag‘ishlangan videoselektor yig‘ilishi o‘tkazildi. Bu haqda Prezident matbuot xizmati xabar berdi.
Qayd etilishicha, koronavirus pandemiyasi ko‘pgina rejalarga jiddiy ta’sir ko‘rsatdi. Lekin qabul qilingan qarorlar va o‘z vaqtida ko‘rilgan choralar natijasida 2020-yilgi budjet parametrlari ijrosi ta’minlanmoqda. Bu esa pandemiya oqibatlarini bartaraf etishga 13,4 trillion so‘m mablag‘ yo‘naltirishga imkon berdi.
Davlat rahbari 2021-yilgi budjetni rejalashtirishda pandemiyaning davom etishi, jahondagi iqtisodiy faollik pasayishini inobatga olish kerakligini ta’kidladi.
Sog‘liqni saqlash sohasiga qariyb 20 trillion so‘m, shundan koronavirusga qarshi kurashish tadbirlari uchun 3 trillion so‘m hamda dori-darmon xaridiga 1,8 trillion so‘m belgilanishi ko‘zda tutilgan.
Ilk bora onkogematologiyaga qariyb 90 milliard so‘m ajratilmoqda. Shuningdek, tamaki savdosidan olingan aksiz solig‘ining 7 foizi Onkogematologik va davolash qiyin bo‘lgan kasalliklarga chalingan bemorlarni sog‘lomlashtirishga ko‘maklashish jamg‘armasiga o‘tkazib beriladi. Shu bilan birga, 2021-yilda birinchi marta gemodializga muhtoj kasallarga tibbiy xizmatlar ko‘rsatish qamrovini 100 foizga yetkazish uchun 130 milliard so‘m yo‘naltiriladi.
Eslatib o‘tamiz, O‘zbekistonda koronavirus infeksiyasiga chalinib davolanayotgan o‘rta ahvoldagi har bir bemor uchun 32 million so‘mdan, jonlantirish bo‘limida yotgan og‘ir ahvoldagi har bir bemorga o‘rtacha 64 million so‘mdan mablag‘ sarflanayotgani ma’lum qilingan.
Sog‘liqni saqlash vaziri Alisher Shodmonov 2020-yilning aprel oyida vazirlikka 5,4 trillion so‘m, shu jumladan, 3,9 trillion so‘m davlat budjetidan va 1,2 trillion so‘m Inqirozga qarshi kurash jamg‘armasidan ajratilganini ma’lum qilgandi. Shuningdek, xalqaro moliya tashkilotlarining 32 million dollar mablag‘i ham o‘zlashtirilgani, jihozlar va qurilmalar sotib olish uchun 150 million dollarga shartnomalar imzolangani ma’lum qilingandi.
Izoh (0)