Shavkat Mirziyoyev 19-oktabr kuni yangi maslahatchisi Suma Chakrabarti bilan O‘zbekistonda islohotlar dasturini uzoq muddatli istiqbolda davom ettirishning strategik yo‘nalishlarini ko‘rib chiqdi.
Prezident matbuot xizmatining xabar berishicha, uchrashuvda chuqur va har tomonlama tahlil asosida ilg‘or xalqaro amaliyot va tajribani hisobga olgan holda O‘zbekistonda yangi o‘sish nuqtalarini aniqlash va yangilanishlarni samarali davom ettirishni ta’minlashga alohida e’tibor qaratilgan.
Xususan, mamlakat iqtisodiyotining muhim tarmoqlarini modernizatsiya qilish va raqobatdoshligini oshirish, davlat boshqaruvi tizimini isloh qilishni chuqurlashtirish va boshqaruv kadrlari sifatini tubdan oshirish, respublikada investitsiya va ishbilarmonlik muhitini takomillashtirishning ustuvor yo‘nalishlari ko‘rib chiqilgan.
Eslatib o‘tamiz, sentabr oyida Yevropa tiklanish va taraqqiyot bankining sobiq prezidenti Suma Chakrabarti O‘zbekiston Prezidenti Shavkat Mirziyoyevning iqtisodiy rivojlanish, samarali boshqaruv va xalqaro hamkorlik masalalari bo‘yicha maslahatchisi etib tayinlanishini ma’lum qilgandi.
Iyul oyining o‘rtalarida Shavkat Mirziyoyev Suma Chakrabartini “Do‘stlik” ordeni bilan mukofotlash to‘g‘risidagi farmonni imzolagan.
Ma’lumot uchun, Shavkat Mirziyoyev Suma Chakrabarti bilan 2017, 2018, 2019 va 2020-yillarda uchrashgan.
Izoh (0)