Namangan viloyatining Chortoq tumanida er aliment pullarini to‘lamaslik uchun o‘z xotinini bo‘g‘ib o‘ldirdi. Bu haqda “Sevimli” telekanalining “Zamon” informatsion dasturida ma’lum qilindi.
Ma’lumotlarga ko‘ra, er otasining uyiga ketib qolgan xotini bilan gaplashib olish uchun ko‘chaga chaqirib, odamlar kam bo‘lgan soy bo‘yidagi daraxtzorga boshlab borgan. Aynan shu yerda erkak ayolning bo‘yin qismini qo‘llari bilan bo‘g‘ib, uni o‘ldiradi. Shundan so‘ng u o‘z aybini bo‘yniga olib, IIBga murojaat qilgan.
Sudlanuvchining onasi so‘zlariga ko‘ra, farzandi shar’iy nikoh asosida, ota-ona roziligisiz oila qurib olgan va uzoq yillar alohida yashab kelgan. Ayol o‘g‘li kelini bilan yashab kelayotgan holatda bir nafar o‘g‘il farzandiga nima sababdan aliment undirishga uringanini hamon tushunmayotganini bildirgan.
Tergov-surishtiruv ishlaridan ma’lum bo‘lishicha, erkak turmush o‘rtog‘iga salkam 23 million so‘m aliment pullarini to‘lashi kerak bo‘lgan.
Jinoyat ishlari bo‘yicha Namangan viloyati sudida erkak sodir etgan jinoyati uchun Jinoyat kodeksining 97-moddasi 2-qismi “i” bandi (qasddan odam o‘ldirish) bilan aybdor deb topib, 17 yilga ozodlikdan mahrum etildi.
Avvalroq Samarqandda aliment to‘lamagani uchun vaqtincha qamoqqa olingan 34 yoshli erkak hibsxonada tutqanog‘i tutib vafot etgani to‘g‘risida xabar berilgandi.
Izoh (0)