O‘zbekiston sog‘liqni saqlash tizimida bir qator yangi yangi tayinlovlar amalga oshirilgani ma’lum qilindi.
Xususan, sog‘liqni saqlash vazirining tegishli buyrug‘iga ko‘ra, vazirlik huzuridagi akademik V.Vohidov nomidagi respublika ixtisoslashtirilgan xirurgiya ilmiy-amaliy tibbiyot markazining direktori lavozimiga Ismailov Saydimurad Ibragimovich tayinlandi.
Ma’lum qilinishicha u 1962-yilda Toshkent shahrida tug‘ilgan, O‘rta Osiyo tibbiyot pediatriya (hozirgi Toshkent pediatriya tibbiyot) institutini hamda O‘zbekiston Prezidenti huzuridagi Davlat boshqaruvi akademiyasini tamomlagan.
Tibbiyot fanlari doktori, professor Saydimurad Ismailov ko‘p yillar davomida tibbiyot sohasida turli lavozimlarda faoliyat yuritgan. Jumladan, 17-sonli shahar klinik shifoxonasi bosh shifokori o‘rinbosari, Toshkent shahar Yakkasaroy tumani tibbiyot birlashmasi boshlig‘i, Sog‘liqni saqlash vazirligi Onalik va bolalikni muhofaza qilish bosh boshqarmasi boshlig‘i, O‘zbekiston Prezidentining Fan, ta’lim, sog‘liqni saqlash va sportni rivojlantirish masalalari xizmatining sog‘liqni saqlash va sportni rivojlantirish masalalari guruhi bosh konsultanti lavozimlarida ishlagan.
Tayinlovdan avval esa O‘zbekiston Respublikasi Prezidenti administratsiyasi Yoshlar, fan, ta’lim, sog‘liqni saqlash va sport masalalari bo‘linmasi sho‘ba mudiri lavozimini egallab kelgan.
Bundan tashqari, Respublika ixtisoslashtirilgan xirurgiya ilmiy-amaliy tibbiyot markazi direktor lavozimida ishlab kelayotgan akademik Nazirov Feruz Gafurovich markaz direktorining maslahatchisi lavozimiga o‘tkazildi.
Shuningdek, O‘zbekiston sog‘liqni saqlash vazirining tegishli buyrug‘iga ko‘ra, vazirlik huzuridagi Respublika ixtisoslashtirilgan kardiologiya ilmiy-amaliy tibbiyot markazining direktori lavozimiga Fozilov Xurshid G‘ayratovich tayinlandi.
Ma’lumot uchun u 1976-yilda Qashqadaryo viloyatida tug‘ilgan bo‘lib, Samarqand davlat tibbiyot institutini tamomlagan. Shuningdek, Rossiyaning A.N.Bakulev nomidagi yurak-qon tomir jarrohlik markazi klinik ordinatura hamda aspiranturasida o‘qigan.
O‘zbekistonga qaytgach, ixtisosligi bo‘yicha faoliyat yuritgan. Tayinlovdan avval esa 2017-yildan buyon Respublika ixtisoslashtirilgan kardiologiya ilmiy-amaliy tibbiyot markazi Qarshi filiali direktori lavozimini egallab kelgan. O‘zbekiston Respublikasi Oliy Majlisi Senati a’zosi.
Bundan tashqari, ushbu tibbiyot muassasasida direktor lavozimida ishlab kelayotgan O‘zbekiston Qahramoni, akademik Qurbonov Ravshanbek Davletovich markaz direktorining maslahatchisi lavozimiga o‘tkazildi. U O‘zbekiston Respublikasida xizmat ko‘rsatgan sog‘liqni saqlash xodimi, fan sohasidagi 1-darajali Davlat mukofoti, “Fidokorona xizmatlari uchun” ordeni sohibi hisoblanadi.
Shu bilan birga, O‘zbekiston sog‘liqni saqlash vazirining tegishli buyrug‘iga asosan Jizzax viloyati sog‘liqni saqlash boshqarmasi boshlig‘i lavozimiga Mahmudova Ozoda Javlonovna tayinlandi.
U 1975-yilda Farg‘ona viloyatida tug‘ilgan bo‘lib, Andijon davlat tibbiyot institutini tamomlagan. Tibbiyot sohasida akusher-ginekologiya yo‘nalishida faoliyat yuritgan. Tayinlovdan avval 2014-yildan buyon Mirzacho‘l tuman tibbiyot birlashmasi boshlig‘i vazifasida ishlab kelgan.
Avvalroq Ichki ishlar tizimida ham yangi lavozim tayinlovlari amalga oshirilgani xabar qilingandi.
Izoh (0)