Qirg‘iziston tashqi ishlar vaziri Ruslan Kazanbayev O‘zbekistonning Qirg‘izistondagi elchisi Xurshid Mirzohidovni qabul qildi. Bu haqda Qirg‘iziston Tashqi ishlar vazirligi xabar berdi.
Vazirlik xabariga ko‘ra, suhbat avvalida O‘zbekiston elchisi Ruslan Kazanbayevni mazkur lavozimga tayinlangani bilan tabrikladi, unga muvaffaqiyatlar tiladi, shuningdek, O‘zbekiston tashqi ishlar vaziri Abdulaziz Komilovning tabriklarini yetkazdi.
O‘z navbatida, Ruslan Kazanbayev O‘zbekiston elchisiga mamlakatdagi vaziyat haqida ma’lumot berdi. Vazirning ma’lum qilishicha, mamlakatdagi siyosiy vaziyat barqarorlashgan. Shuningdek, vazir Qirg‘iziston parlamentining yangi spikeri saylangani, bosh vazir va hukumat a’zolari tayinlanganini ma’lum qildi.
Uchrashuv chog‘ida tomonlar ikki tomonlama hamkorlikning dolzarb yo‘nalishlari va istiqbollari yuzasidan fikr almashdi, shuningdek, mintaqaviy va xalqaro tashkilotlar doirasida hamkorlikni mustahkamlash bo‘yicha keyingi harakatlarni muhokama qildi.
Ruslan Kazanbayev avval erishilgan kelishuvlarning to‘liq amalga oshirilishi muhimligini ta’kidladi. Shu sababli Ruslan Kazanbayev yaqin vaqt ichida O‘zbekiston tashqi ishlar vaziri Abdulaziz Komilov bilan uchrashishga tayyorligini bildirdi.
“Qirg‘iziston—O‘zbekiston davlat chegaralarini delimitatsiya va demarkatsiya qilish bo‘yicha muzokaralar jarayoni va savdo-iqtisodiy hamkorlikka alohida e’tibor qaratildi”, — deyiladi vazirlik xabarida.
Izoh (0)