Lufthansa Technik компаниясининг касаба уюшмаси компания раҳбариятини Беларусь президенти Александр Лукашенконинг расмий ташрифлари учун фойдаланиладиган самолётлардан бирига техник хизмат кўрсатишдан бош тортишга чақирди. Бу ҳақда Беларусь демократик касаба уюшмалари конгрессининг раиси Александр Ярошукка таяниб, Meduza хабар берди.
Унинг сўзларига кўра, конгрессга Германиянинг хизмат кўрсатиш соҳаси ходимлари касаба уюшмалари бирлашмаси Verdi’дан хабар келиб тушган. Verdi’нинг таркибига Lufthansa Теchnik компаниясининг касаба уюшмаси ҳам киради.
Verdi томонидан жўнатилган хабарга кўра, Лукашенкога тегишли Boeing 737 самолёти 13 октябрь куни Lufthansa Technik компаниясининг техник хизматидан фойдаланиш учун Гамбург шаҳрига учиб келган. Компаниянинг касаба уюшмаси раҳбариятни самолётга хизмат кўрсатишдан бош тортадиган ходимларни жазоламасликка чақирган.
Маълум қилинишича, бунга ўхшаш ҳолат 31 йил аввал ҳам юз берган. Руминиянинг ўша вақтдаги президенти Николае Чаушеску унинг самолёти компания томонидан таъмирланиши керак бўлган пайтда ишчилар намойишини бостирган. Ўшанда компания ишчилари норозилик белгиси сифатида самолётга хизмат кўрсатишган бош тортган. Ҳозир ҳам касаба уюшмаси агар ходимлар Лукашенконинг самолётига хизмат кўрсатишдан бош тортса, компания раҳбарияти уларни жазоламаслигини кутмоқда.
Ярошукнинг маълум қилишича, Lufthansa Technik Лукашенконинг самолётига хизмат кўрсатиш-кўрсатмаслигини билмайди. Унинг сўзларига кўра, компания раҳбарияти мураккаб вазиятга тушиб қолган. Шартномага амал қиладими ёки ишчилар билан бир фикрда бўладими, ҳозирча номаълум.
Беларусда норозилик намойишлари бошланганидан кейин Германия Беларусь мухолифатини қўллаб-қувватлади. Германия канцлери Ангела Меркель Александр Лукашенконинг президентлик сайловидаги рақиби Светлана Тихановская билан учрашди. Германия ташқи ишлар вазири Хайко Маас Беларусь президенти Лукашенкога қарши санкция жорий қилиш таклифини билдирди.
Эслатиб ўтамиз, Европа Иттифоқи етакчилари сайловнинг сохталаштирилиши ва инсон ҳуқуқлари бузилиши учун жавобгар бўлган Беларуснинг 40 нафар расмий шахсига нисбатан санкциялар жорий қилишга қарор қилганди. Европа Иттифоқининг санкцияларига жавобан Беларусь европалик мансабдорларга нисбатан ўзининг санкцияларини жорий қилди,
Аввалроқ Литва, Латвия, Эстония, Словакия, Украина, Германия, Канада, Польша, АҚШ, Швеция, Норвегия, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортганди.
Изоҳ (0)