Xitoylik harbiylar urushga tayyor turishi kerak, dedi Xitoy Xalq Respublikasi raisi Si Szinpin Guandun provinsiyasidagi harbiy bazaga tashrifi chog‘ida dengiz piyodalari korpusiga murojaat qilar ekan. Bu haqda “RBK” xabar bermoqda.
“Biz barcha aql va kuchimizni urushga tayyorgarlik ko‘rishga va yuqori shaylikni saqlab turishga qaratishimiz kerak”, — dedi XXR raisi.
Uning so‘zlariga ko‘ra, harbiy xizmatchilar mutlaqo sodiq va ishonchli bo‘lishi kerak.
Shuningdek, u dengiz piyodalari korpusini Xitoy milliy suverenitetini, xavfsizligini, hududiy yaxlitligini va manfaatlarini himoya qilishi kerak bo‘lgan elita bo‘linmasi deb atadi. Si Szinpin ushbu bo‘linmani kuchaytirish zarurligini qo‘shimcha qildi.
Avvalroq Pentagon Xitoy Xalq ozodlik armiyasi kamida uchta mudofaa sohasida AQSh armiyasidan o‘zib ketganligini aytgan edi. Ta’kidlanishicha, bular — kemasozlik, o‘rta masofaga uchuvchi qanotli va ballistik raketalar, shuningdek, havo hujumiga qarshi integratsiyalashgan mudofaa vositalari sohalaridir.
Avvalroq AQSh prezidenti Donald Tramp Twitter’dagi videomurojaatida Xitoyga koronavirus tarqatganligi qimmatga tushishini aytgan edi. “Bunday voqea yuz bergani sizlarning aybingiz emas, bu Xitoyning aybi. Xitoyga esa bizning mamlakatga qilgan ishi qimmatga tushadi. Xitoyning butun dunyoga qilgan ishi qimmatga tushadi. Shuni esda tutinglar”, — degan edi prezident.
Eslatib o‘tamiz, Xitoy poytaxti Pekin shahri rasmiylari shaharga kiradigan odamlar sonini nazorat ostiga olishga qaror qildi. Endi shaharga bir kunda kirishi mumkin bo‘lgan kishilar soni eng ko‘pi bilan 500 kishini tashkil qiladi.
Izoh (0)