Хитойлик ҳарбийлар урушга тайёр туриши керак, деди Хитой Халқ Республикаси раиси Си Цзиньпин Гуандун провинциясидаги ҳарбий базага ташрифи чоғида денгиз пиёдалари корпусига мурожаат қилар экан. Бу ҳақда «РБК» хабар бермоқда.
«Биз барча ақл ва кучимизни урушга тайёргарлик кўришга ва юқори шайликни сақлаб туришга қаратишимиз керак», — деди ХХР раиси.
Унинг сўзларига кўра, ҳарбий хизматчилар мутлақо содиқ ва ишончли бўлиши керак.
Шунингдек, у денгиз пиёдалари корпусини Хитой миллий суверенитетини, хавфсизлигини, ҳудудий яхлитлигини ва манфаатларини ҳимоя қилиши керак бўлган элита бўлинмаси деб атади. Си Цзиньпин ушбу бўлинмани кучайтириш зарурлигини қўшимча қилди.
Аввалроқ Пентагон Хитой Халқ озодлик армияси камида учта мудофаа соҳасида АҚШ армиясидан ўзиб кетганлигини айтган эди. Таъкидланишича, булар — кемасозлик, ўрта масофага учувчи қанотли ва баллистик ракеталар, шунингдек, ҳаво ҳужумига қарши интеграциялашган мудофаа воситалари соҳаларидир.
Аввалроқ АҚШ президенти Дональд Трамп Twitter’даги видеомурожаатида Хитойга коронавирус тарқатганлиги қимматга тушишини айтган эди. «Бундай воқеа юз бергани сизларнинг айбингиз эмас, бу Хитойнинг айби. Хитойга эса бизнинг мамлакатга қилган иши қимматга тушади. Хитойнинг бутун дунёга қилган иши қимматга тушади. Шуни эсда тутинглар», — деган эди президент.
Эслатиб ўтамиз, Хитой пойтахти Пекин шаҳри расмийлари шаҳарга кирадиган одамлар сонини назорат остига олишга қарор қилди. Энди шаҳарга бир кунда кириши мумкин бўлган кишилар сони энг кўпи билан 500 кишини ташкил қилади.
Изоҳ (0)