Qirg‘izistonda siyosiy vaziyat barqarorlashib, hukumat organlari faoliyati qayta tiklangunga qadar Rossiya ushbu mamlakatga har qanday moliyaviy ko‘makni to‘xtatib qo‘yadi. Bu haqda Rossiya moliya vazirligiga tayanib, “RBK” xabar bermoqda. Buni federal mansabdor ham tasdiqlagan.
“Qirg‘izistonda yuzaga kelayotgan vaziyatni inobatga olgan holda mamlakatda siyosiy vaziyat barqarorlashib, hukumat organlari faoliyati tiklangunicha, moliyaviy yordam berish to‘xtatildi”, — dedi ulardan biri.
Rossiya moliya vazirligi bu xabarga rasman izoh berganicha yo‘q.
Rossiyaning Qirg‘izistonga moliyaviy ko‘magi to‘g‘risida oxirgi marta 2019-yilda xabar berilgan edi: o‘shanda Rossiya 30 million dollarni beg‘araz taqdim etgan. 2005-yildan buyon Rossiya Qirg‘izistonning 700 million dollardan ortiq qarzidan kechgan. 2012-yildan buyon Moskva Bishkekka 200 million dollardan ortiq qiymatda beg‘araz grantlar taqdim etgan.
Shuningdek, Rossiya Yevrosiyo barqarorlik va rivojlanish jamg‘armasining asosiy paychi hisoblanadi, ushbu jamg‘arma 2020-yil avgustida Qirg‘izistonga 100 million dollarlik kredit ajratishga qaror qilgan. Hozircha jamg‘arma kanali orqali ko‘mak to‘xtatilishi aniq emas, ammo Moskva jamg‘arma ustav kapitalining 88 foizini nazorat qiladi.
Qirg‘izistonda 4-oktabr kuni parlament saylovi bo‘lib o‘tdi. Markaziy saylov komissiyasining dastlabki ma’lumotlarga ko‘ra, parlamentda deputatlik o‘rniga ega bo‘lish uchun zarur bo‘lgan yetti foizlik dovondan to‘rtta partiya o‘ta oldi.
Saylov natijalaridan norozi bo‘lgan minglab kishilar 5-oktabr kuni namoyishga chiqdi. Namoyishlar tartibsizlikka aylanib ketdi, tartibsizliklarda bir necha yuz kishi jarohat oldi, bir kishi vafot etdi. Namoyishchilar mamlakat parlamenti va prezident administratsiyasi joylashgan binoni egallab oldi, shuningdek, mamlakatning sobiq prezidenti Almazbek Atambayev va sobiq bosh vazir Sapar Isakovni qamoqdan ozod qildi. Qirg‘iziston Markaziy saylov komissiyasi 6-oktabr kuni parlament saylovi natijalarini haqiqiy emas deb topdi. Norozilik namoyishlari fonida Bishkek shahriga namoyishchilar tomonidan yangi mer tayinlandi. 9-oktabr kuni Qirg‘iziston prezidenti hukumat va bosh vazirni iste’foga chiqardi.
Izoh (0)