Россия Қирғизистонга молиявий кўмак беришни тўхтатди

Қирғизистонда сиёсий вазият барқарорлашиб, ҳукумат органлари фаолияти қайта тиклангунга қадар Россия ушбу мамлакатга ҳар қандай молиявий кўмакни тўхтатиб қўяди. Бу ҳақда Россия молия вазирлигига таяниб, «РБК» хабар бермоқда. Буни федерал мансабдор ҳам тасдиқлаган.

«Қирғизистонда юзага келаётган вазиятни инобатга олган ҳолда мамлакатда сиёсий вазият барқарорлашиб, ҳукумат органлари фаолияти тиклангунича, молиявий ёрдам бериш тўхтатилди», — деди улардан бири.

Россия молия вазирлиги бу хабарга расман изоҳ берганича йўқ.

Россиянинг Қирғизистонга молиявий кўмаги тўғрисида охирги марта 2019 йилда хабар берилган эди: ўшанда Россия 30 миллион долларни беғараз тақдим этган. 2005 йилдан буён Россия Қирғизистоннинг 700 миллион доллардан ортиқ қарзидан кечган. 2012 йилдан буён Москва Бишкекка 200 миллион доллардан ортиқ қийматда беғараз грантлар тақдим этган.

Шунингдек, Россия Евросиё барқарорлик ва ривожланиш жамғармасининг асосий пайчи ҳисобланади, ушбу жамғарма 2020 йил августида Қирғизистонга 100 миллион долларлик кредит ажратишга қарор қилган. Ҳозирча жамғарма канали орқали кўмак тўхтатилиши аниқ эмас, аммо Москва жамғарма устав капиталининг 88 фоизини назорат қилади.

Қирғизистонда 4 октябрь куни парламент сайлови бўлиб ўтди. Марказий сайлов комиссиясининг дастлабки маълумотларга кўра, парламентда депутатлик ўрнига эга бўлиш учун зарур бўлган етти фоизлик довондан тўртта партия ўта олди.

Сайлов натижаларидан норози бўлган минглаб кишилар 5 октябрь куни намойишга чиқди. Намойишлар тартибсизликка айланиб кетди, тартибсизликларда бир неча юз киши жароҳат олди, бир киши вафот этди. Намойишчилар мамлакат парламенти ва президент администрацияси жойлашган бинони эгаллаб олди, шунингдек, мамлакатнинг собиқ президенти Алмазбек Атамбаев ва собиқ бош вазир Сапар Исаковни қамоқдан озод қилди. Қирғизистон Марказий сайлов комиссияси 6 октябрь куни парламент сайлови натижаларини ҳақиқий эмас деб топди. Норозилик намойишлари фонида Бишкек шаҳрига намойишчилар томонидан янги мэр тайинланди. 9 октябрь куни Қирғизистон президенти ҳукумат ва бош вазирни истеъфога чиқарди.