Italiyaning Aznom Automotive kompaniyasi Palladium limuzini interyerining ilk suratlarini namoyish etdi. Olti metrli “giperlimuzin” to‘rtta o‘rindiq, noodatiy divan va mini-barga ega bo‘ladi, deb xabar beradi Motor.
Orqadagi yo‘lovchilar uchun ajratilgan joy nafaqat keng, balki “ultraqulay” ham hisoblanadi. Divan alohida ajraluvchi suyanchiqlar bilan jihozlangan bo‘lib, uni yo‘lovchilar o‘zlariga moslashtirib olishi mumkin. O‘rindiq oyoqchalarida esa ichimliklar, sigara va boshqa mayda-chuydalarni saqlash uchun maxsus sovutgichga ega bo‘lmalar mavjud.
Taqdim etilgan suratlarda model interyeri ikki xil rangdagi charm va yog‘och panellar bilan qoplangan, biroq mijoz buyurtmasidan kelib chiqib dizaynerlar eksklyuziv jihozlashni ham amalga oshirishi mumkin. Kompaniyadagilarning ta’kidlashicha, limuzinni jihozlash imkoniyati deyarli cheksiz.
Palladium modeli Camal Studio bilan hamkorlikda yaratilgan bo‘lib, uning uzunligi qariyb 6 ming millimetrga, balandligi esa — 2 ming millimetrga yetadi. Limuzinning orqa eshiklari harakat yo‘nalishiga qarshi ochiladi. Modelga 671 ot kuchiga ega 5,7 litrli dvigatel va to‘liq uzatmali tizim o‘rnatilishi kutilmoqda.
Mavzuga doir: Dunyodagi eng tezkor limuzin sotuvga qo‘yildi (foto)
Izoh (0)