“Avto.ru” saytida bundan 46 yil oldin ishlab chiqarilgan “VAZ-2101” modeli 549 999 rublga (7 ming dollar) sotilayotgani to‘g‘risida e’lon paydo bo‘ldi. Mashina narxnining bu qadar qimmatligi u hozirga qadar 8,5 ming kilometr yo‘l bosgani va undan faqatgina bir kishi foydalangani bilan izohlanmoqda. Taqqoslash uchun, yangi Lada Granta’ning narxi 483 ming rubldan boshlanadi, deb yozadi Motor.
Sotuvga qo‘yilgan nusxaning yana bir o‘ziga xos jihati — sovet davriga tegishli qora raqamga egaligida. Sotuvchining ta’kidlashicha, avtomobil 1970-yillardagi kabi holatda saqlangan, hech qachon ta’mirlanmagan va restavratsiya qilinmagan. “Kopeyka” nomini olgan model oq rangda bo‘lib, saloni jigarrang-sariq rangda ishlangan, barcha agregatlari soz holatda.
“VAZ-2101” 59 ot kuchiga ega 1,2 litrli benzin dvigatel bilan jihozlangan bo‘lib, u to‘rt pog‘onali mexanik uzatmalar qutisi yordamida boshqariladi.
Sotuvchi dastlab avtomobil narxini 600 ming rubl deb e’lon bergan, biroq xaridor topilmagach, uni kamaytirishga to‘g‘ri kelgan.
Ma’lumot uchun, “Kopeyka” nomini avtomobil 1990-yillar oxirida, model nomerining oxiridagi bir raqami sabab olgan.
Avvalroq Rossiyada tyuning qilingan Lada 4x4 salkam 16 ming dollar evaziga, Italiyada eski “GAZ-69” mashinasi yangi Lada Granta narxida sotuvga qo‘yilgani to‘g‘risida xabar berilgandi.
Izoh (0)